RUS
SMARTNEWS.KZ басылымының хабарлауынша, АҚШ президенті Дональд Трамп Netflix пен Warner Bros. Discovery арасындағы ауқымды келісімге қайта қарау қажет екенін мәлімдеді. Оның айтуынша, бірігу нәтижесінде нарықтағы үлесі «шамадан тыс ірі» компания қалыптасуы мүмкін. Бұл туралы The Wall Street Journal хабарлады.
Трамп мәміленің «бірқатар рәсімдерден өтуі тиіс» екенін атап өтіп, шешім қабылдау процесіне өзі де араласатынын айтты. Бұған дейін салалық кәсіподақтар да алаңдаушылық білдіріп, бірігу жұмыс орындарының қысқаруына және киноөндіріс пен дистрибуция көлемінің төмендеуіне әкелуі ықтимал екенін ескерткен.
Warner Bros. Discovery қазан айының соңында корпорацияны екіге бөлу, толықтай сату немесе жекелеген активтерден бас тарту нұсқаларын қарастырып жатқанын хабарлаған еді. Ал 5 желтоқсанда компания Netflix-ке стримингтік және студиялық активтерін 82,7 млрд долларға сатуға келісім берді.
Егер мәміле АҚШ-тың федералды реттеушілері тарапынан мақұлданса, Netflix бақылауына HBO Max платформасы, HBO телеарнасы, сондай-ақ «Хәрри Поттер», «Тақтар ойыны», «Азамат Кейн», «Касабланка» және басқа да ірі франшиза мен фильмдердің құқықтары өтеді.