RUS
SMARTNEWS.KZ басылымының хабарлауынша, Сәтбаевтағы тұрмыстық техника дүкенінде бір ер адам қолына бірнеше пышақ алып, қызметкерлерге тап беріп, боқтап жар салған. Оқиға видеоға түсіп, желіде тарады. Ұлытау облысының полициясы күдіктінің ұсталғанын растады.
Halyqstan Telegram-арнасының мәліметінше, ер адам дүкен ішіне кірген бойда айқайлап, қызметкерлерге пышақпен қарсы тұрған. Сатушылар өздерін қорғау үшін қолдарына швабра мен орындық алып, оны ақырындап шығу есігіне қарай ығыстырған. Дүкеннен тек пышақтарын тастағаннан кейін ғана шығарылған. Артынша ол оқиға орнынан қашып кеткен.
Ұлытау облысы ПД мәліметінше, оқиға 7 желтоқсанда тіркелген. Күдікті дүкен сөресінен асүй пышағын алып, қызметкерлерге күш қолданамын деп қорқытқан әрі дүкен мүлкіне зақым келтірген. Жапа шеккендер жоқ.
102 нөміріне хабар түскен бойда полиция оқиға орнына барып, күдіктіні ізін суытпай қолға түсірді. Қазір ол уақытша ұстау изоляторына қамауға алынды. Қылмыстық іс қозғалды, тергеу жалғасуда.