Астанадағы 3 жасар қыздың өлімі: анестезиолог соңғы минуттарда не болғанын айтып берді

SMARTNEWS.KZ басылымының хабарлауынша, Астанада үш жасар Зере Есентайдың өліміне қатысты сот процесі жалғасып жатыр. «Dent Park Ortho» жеке стоматологиясының анестезиологы Аида Жұмағалиева кезекті отырыста трагедияға апарған сәттердің толық хронологиясын баяндады.

Дәрігердің айтуынша, оқиға болған күні клиникада жұмыс қарқыны жоғары болған. Оның сөзінше, наркоз да, бастапқы кезең де қалыпты басталған. Қиындық бірнеше минуттан кейін, бала ояна бастаған тұста пайда болған.

«Мен монитордан пульс толқынының өзгергенін байқадым. Бірқалыпты жүріп тұрған сызық секіре бастады. Бұл – жүрек ырғағының бұзылғанын білдіреді. Экстрасистолдар пайда болды», – деді анестезиолог.

Бірнеше секундтан кейін пульс толқынының амплитудасы төмендеген.

«Амплитуда күрт қысқарды. Бұл қанның периферияға жеткілікті көлемде бармай жатқанын көрсетеді. Монитор көрсеткен мәліметтің нақты жағдайға сәйкестігін тексеру үшін жүректі тыңдай бастадым», – деді ол.

Осы сәттен кейін жүрек тиімді жұмысын тоқтатқан.

«Жүрек тондарын ести алмадым. Ол енді тұрақты соқпай жатты. Мен дереу тікелей жүрек массажын бастадым», – деді Жұмағалиева.

Бала жағдайы одан әрі нашарлап, жүрек фибрилляциясына өткен.

«Бұл – бірнеше секундқа ғана созылатын, өмірге аса қауіпті кезең. Жүрек ырғақты соқпай, тек дірілдейді. Мониторда 190, 300, кейін 140–150 деген көрсеткіштер көрінген», – деді ол.

Фибрилляциядан кейін толық асистолия – жүректің толық тоқтауы – тіркелген.

«Асистолия бірден басталды. Жүректің өткізгіш жүйесі істен шыққанда оны қалпына келтіру іс жүзінде мүмкін емес», – деді дәрігер.

Сотта наркоздың ұзақтығы мен ем жоспарының өзгергені де көтерілді. Анестезиологтың айтуынша, стоматолог пен ата-ананың әңгімесінен-ақ ұзақ операция жоспарланғанын түсінген.

«Клиникада ем жоспарын операция кезінде түзету қалыпты тәжірибе. Қалың тіс қақтарынан ақаулар көрінбей қалуы мүмкін. Бала оянғанда ауру тудыратын тісті қалдыру дұрыс шешім емес», – деді ол.

Жұмағалиева наркоз-тыныс аппаратының толық жарамды болғанын, барлық тексеруден қателіксіз өткенін атап өтті. Операция кезінде қосылған музыканың да рұқсат етілгенін айтты.

«Монитор үнемі менің алдымда тұрды. Бүкіл процесті өзім бақылап отырдым», – деді анестезиолог.

Қыз баланың өліміне қатысты резонансты іс бойынша сот талқылауы жалғасып жатыр.

Еске салайық, 2024 жылдың күзінде Астанада 3 жасар Зере тіс емінен кейін наркоздан оянбай қайтыс болған еді. Қызға бірден 18 тісті жалпы наркозбен емдеу жоспарланған. Қазаға байланысты тек бір маман емес, бүкіл клиниканың жауапкершілігі туралы сұрақ күн тәртібінен түскен жоқ.

Қорғаушының айтуынша, олардың сараптамасы өлім себебін жүректің тоқтауымен байланыстырады. Ал хаттамадағы уақыт қателігі дәрігердің шатасуымен түсіндірілген. Клиника басшылығы жәбірленуші тарап адвокаты 25 млн теңге талап еткенін мәлімдеді.