RUS
SMARTNEWS.KZ басылымының хабарлауынша, Украина президенті Владимир Зеленский Украина мен Еуропа елдерінің ұлттық қауіпсіздік жөніндегі кеңесшілері бейбіт жоспардың жаңартылған нұсқасын талқылауды жалғастыратынын мәлімдеді. Бұл туралы ол Лондонда өткен онлайн-брифингте айтты.
Президенттің сөзінше, бастапқыда 28 тармақтан тұрған бейбіт жоспар қазір 20 тармаққа дейін қысқарған. Алайда бірқатар мәселелер бойынша ортақ ұстаным әлі қалыптаспаған. Талқыланып жатқан түйткілдердің ішінде территорияға қатысты ұстанымдар, соғыстан кейінгі қалпына келтіру және қауіпсіздік кепілдіктері бар.
Зеленский бұл жолғы Лондондағы келіссөздерде елеулі ілгерілеу байқалғанын атап өтті. Оның айтуынша, Еуропа тарапымен талқыланған соңғы нұсқа соғысты аяқтауға қатысты «мүмкін болатын шешімдерге қарай жылжып келеді».
Президент Украина мен Еуропаның ұлттық қауіпсіздік жөніндегі кеңесшілері құжатты пысықтауды жалғастыратынын жеткізді. Оның дерегінше, жоспардың жаңартылған нұсқасы сейсенбі кешінде-ақ АҚШ-қа жолдануы мүмкін.
Бұған дейін АҚШ президенті Дональд Трамп Украина жөніндегі бейбіт бастамаға қатысты пікір білдіріп, Зеленскийдің құжатпен таныспағанына қынжылыс білдірген еді. Ал АҚШ-тың Украина бойынша арнайы өкілі Кит Келлог соғысты тоқтату үшін шешілуі тиіс екі негізгі мәселені атаған.
Сонымен қатар Батыс басылымдары еуропалық көшбасшылар Зеленскийге Ресейге қатысты ықтимал келісімдерге бармас бұрын Вашингтоннан берік кепіл алу қажет екенін ескерткенін жазған.
Зеленский Донбасс мәселесінде АҚШ, Ресей және Украинаның көзқарастары ортақ емес екенін де айтты.