RUS
SMARTNEWS.KZ басылымының хабарлауынша, Абай облысының әкімі Берік Уәли Аягөз ауданының халқымен кездесуде өңірде жұмыс істеп жүрген Қытай азаматтарына қатысты көзқарасын ашық айтты. Ол шетелдік жұмысшыларды негізсіз қорқыныш пен күдікке байлап қоюдың дұрыс еместігін атап өтті.
Әкімнің сөзінше, Қытай инвестициясы – әлем елдері үшін тартымды ресурс, ал олардың келуі жол салу сияқты ірі инфрақұрылымдық жобаларды жылдам жүзеге асыруға мүмкіндік береді. Уәли Калбатау–Майқапшағай бағытының құрылысына кезінде 200-ден аса жергілікті тұрғын жұмылдырылғанын еске салды.
«Қарапайым халықты Қытайға қарсы қоюға болмайды. Олар бізге жол салуға келді. Егер талапқа сай жұмыс істей алсақ, неге тартпасқа? Қытай компаниялары әлемнің түкпір-түкпірінде жұмыс істейді, сол себепті қорқатын ештеңе жоқ», – деді облыс әкімі.
Оның айтуынша, ҚХР азаматтары Аягөз–Бахты теміржолының құрылысында да еңбек етіп жатыр. Әкім бұл жоба аймақ экономикасына түсетін ірі капитал екенін және болашақта жаңа жұмыс орындарын ашатынын атап өтті.
Берік Уәли Қазақстан мен Қытай арасындағы визасыз режим байланыстарды күшейтіп отырғанын еске салды. Ол тұрғындарды бұл мүмкіндікті пайдаланып, сауда-саттық пен қызмет көрсету салаларында белсенді болуға шақырды.
«Қытайлықтар осында тұрақтап қалмайды – келіп, жұмысын істеп, еліне қайтады. Біз де көрші елге барып, табыс таба аламыз. Жастарды да олардан үркітудің қажеті жоқ. Олар біздің жолымызды салуға келді», – деді өңір басшысы.
Әкімнің айтуынша, Шәуешек–Аягөз байланысын қамтамасыз ететін жаңа теміржол ішкі Қытайдан келетін жүк пойыздарының қақпасы болады. Бұл Аягөз үшін экономикалық серпіліс әкелуі ықтимал.
«Қытайлық компания шамамен 300 шақырым жол салады. Егер олардың өкілдері заң бұзса, жауапқа тартылады немесе елден шығарылады. Бақылау жергілікті органдардың қолында», – деді Берік Уәли.