RUS
SMARTNEWS.KZ басылымының хабарлауынша, Таиланд полициясы Бангкоктың қақ ортасында есірткі тарату желісін ұйымдастырды деген күдікпен екі ресей азаматын қамауға алды. Бұл туралы жергілікті Khaosod порталы мәлімдеді. Тергеу материалдарына сай, 34 жастағы Иван мен 35 жастағы Марк заңсыз бизнесті жүргізу үшін жасанды интеллект пен QR-кодтарды пайдаланған.
Полиция дерегінше, олар қаладағы бірнеше ауданға орыс тілінде жазылған QR-код жапсырмаларын іліп шыққан. Сол кодтарға өткен адамдарды Марк пен Иван бақылайтын, жасанды интеллектке негізделген Telegram-арнаға бағыттап отырған. Бот криптовалюта арқылы жасалған төлемдерді сол мезетте қабылдап, ақша түскен сәтте Таиландтың әр аймағында жасырылған есірткі қоймаларының фотосы мен нақты координаттарын жіберген. Жүйе «қазына іздеу» ойындарына ұқсатып құрылған.
Тінту кезінде құқық қорғаушылар олардан небәрі 200 мың бат қолма-қол ақша, сұр фургон, бірнеше ноутбук, банк кітапшалары, сондай-ақ 40-тан аса марихуана бүршігі салынған пакет, 25 банка каннабис шайыры және каннабис тұқымдарын тәркіледі.
Иванға бақыланатын заттарды заңсыз жарнамалау және «5-санаттағы» есірткі (оның ішінде каннабис экстрактілері) сақтау бойынша айып тағылған. Марк «5-санаттағы» есірткіні заңсыз сақтау және визасының мерзімін өткізіп алу дерегі бойынша жауапқа тартылып отыр.
Тергеу кезінде Марк тек визасының мерзімі өтіп кеткенін мойындаған. Оның айтуынша, өзі каннабис қолдануға медициналық рұқсатқа ие және оны сатуға лицензиясы бар. Ал Иван барлық айыптауды жоққа шығарып отыр.