RUS
Жаңадан құрылған орган Қазақстандағы исламдық қаржыландыруды өрістету бойынша тәуелсіз сараптамалық орталыққа айналмақ. Кеңес заңнаманы жетілдіру, шариғат стандарттары, капитал нарықтары, орнықты қаржы, цифрлық шешімдер мен халықаралық әріптестік бағыттары бойынша ұсыным әзірлейді.
АХҚО-ның исламдық қаржы бағытын басқаратын Мәдина Тұқұлова кеңестің құрылуын индустрия қарқынын күшейтетін маңызды қадам деп атап өтті:
«Әлемнің негізгі ислам қаржы орталықтарынан жиналған сарапшылардың тәжірибесін тоғыстыра отырып, біз өңір үшін сапа мен ашықтықтың жаңа стандарттарын қалыптастыра аламыз» – деді ол.
Lemrair Consultancy Company басшысы д-р Аднан Ахмед Юсиф те бұл бастаманы Еуразиядағы исламдық қаржының институционалдық дамуы үшін стратегиялық кезең деп атады. Оның айтуынша, Қазақстан этикалық және орнықты қаржылық шешімдерді дамытуда айтарлықтай әлеуетке ие.
Өңірдегі исламдық қаржыландыру мүмкіндіктері талқыланды
Алғашқы отырыста кеңес мүшелері Қазақстан мен Орталық Азияда исламдық қаржы нарығын кеңейтудің кедергілері мен әлеуетін талдады. Сарапшылар 2026–2028 жылдарға арналған басымдықтарды анықтады. Олардың ішінде:
жаңа исламдық қаржы өнімдерін әзірлеу;
халықаралық институттарды тартуды күшейту;
инвестициялық тартымдылықты арттыру;
АХҚО-дағы шариғат басқару жүйесін жетілдіру.
Кеңес мүшелері шариғат талаптарына сай шешім қабылдау үдерістерінің ашықтығын арттыру қажеттігін қолдады. Бұл инвесторлардың сенімін күшейтіп, Қазақстанда халықаралық стандарттарға сай исламдық қаржы экожүйесін қалыптастыруға мүмкіндік береді.
Жасыл қаржы және сукук – жаңа басым бағыттар
Кеңес жасыл қаржы саласындағы исламдық құралдарды дамыту перспективаларын да қарастырды. Қазақстанның жасыл және ESG-бағдарланған сукук шығару әлеуеті жоғары екені атап өтілді.
Кеңес құрамына енген халықаралық сарапшылар
Жаңадан құрылған консультативтік кеңеске исламдық қаржының әлемдік деңгейдегі жетекші мамандары кірді:
Д-р Сами Әл-Сувайлем – Ислам даму банкі институтының директорының міндетін атқарушы
Д-р Аднан Ахмед Юсиф – Бахрейн мен Таяу Шығыстың ислам банкингі көшбасшыларының бірі
Проф. Дато д-р Азнан Хасан – Малайзия Халықаралық ислам университетінің шариғат профессоры
Лим Сэй Чонг – БАӘ-дегі тәуелсіз директор, капитал нарықтары мен цифрлық активтер жөніндегі сарапшы
Фатма Чынар – Түркияның қатысу банктері қауымдастығының өкілі
Майя Марисса Малек – Sabiq Advisory бас директоры
Мәдина Тұқұлова – АХҚО исламдық қаржы бағытының басшысы
Кеңестің құрылуы Қазақстанның Орталық Азиядағы исламдық қаржыландыру хабы ретіндегі орнын күшейтіп, халықаралық деңгейде танылған экожүйе қалыптастыруға бағытталған маңызды қадам саналады.