RUS
SMARTNEWS.KZ басылымының хабарлауынша, Қазақстан Сыртқы істер министрі Ермек Көшербаев Венада өткен ЕҚЫҰ Сыртқы істер министрлері кеңесі аясында украиналық әріптесімен кездесуде Каспий құбыр консорциумы (КҚК) нысандарына жасалған шабуыл жөнінде сөз қозғады. Министрдің айтуынша, тараптар бұл мәселе бойынша ортақ түсіністікке келген.
Көшербаев екіжақты ынтымақтастық, сауда қатынастары және қауіпсіздік мәселелерімен бірге Каспий құбыр консорциумының жағдайын талқылағанын айтты.
«Украиналық тараппен жағдайдың тұрақты болуы керектігі жөнінде түсіністік бар», – деді ол Ақорда дәлізінде.
Бұл кездесуге дейін СІМ ресми өкілі Айбек Смадияров тараптардың сөйлескенін хабарлаған еді.
Айта кетейік, 29 қарашада таңғы 06:06-да Новороссийск маңындағы КҚК-ның теңіз инфрақұрылымы дрон-қайықтар арқылы шабуылға ұшыраған болатын. Қазақстан Үкіметі оқиғаны ерекше бақылауға алды. 30 қарашада Қазақстан КҚК нысандарына жасалған кезекті шабуылға байланысты ресми қарсылық нотасын жолдады.
Кейін Украина Қазақстанның наразылығына жауап берді. Киев Астананың алаңдаушылығын қабылдағанын мәлімдеп, өз әрекеттерінің бағытын түсіндірді. Украина СІМ-і бұл операциялардың Қазақстанға немесе басқа мемлекеттерге қарсы бағытталмағанын айтып, «барлық әскери күш Ресейдің агрессиясына қарсы қорғанысқа жұмылдырылғанын» жеткізді.
Украина мәлімдемесінде Ресейді «Қара теңіз аймағындағы тұрақсыздықтың бірден-бір көзі» деп атады және Қазақстанның Ресейдің Украинадағы азаматтық нысандарға жасаған соққыларын айыптамағанын еске салды. Киев әлем елдерін соғыстың тоқтауына әсер етуге шақырды.
Мәлімдеме соңында Украина:
«Қазақ халқына деген өзгермес құрметімізді және екі ел арасындағы тарихи байланыстарға сай, Қазақстанмен достық әрі прагматикалық қатынастарды дамытуға ұмтылысымызды растаймыз», – деп атап өтті.
Каспий құбыр консорциумындағы соңғы оқиға ВПУ-2 құрылғысы дрон-қайық шабуылынан зақымданғаннан кейін басталды. Тиеу жұмыстары тоқтатылып, танкерлер аймақтан шығарылды. Зардап шеккендер жоқ. Қазақстан Энергетика министрлігі түсініктеме беріп, СІМ Украинаға ресми нота жолдағанын растады.