RUS
SMARTNEWS.KZ басылымының хабарлауынша, Transfermarkt порталы Ресей премьер-лигасында (РПЛ) өнер көрсететін футболшылардың жаңартылған трансферлік бағасын жариялады. Бұл тізімде Қазақстанның үш ойыншысы бар.
Қазақстан ұлттық құрамасының тарихындағы ең нәтижелі футболшы Бақтияр Зайнутдинов 300 мың еуроға арзандады. Қазіргі таңда 27 жастағы жартылай қорғаушының трансферлік құны 2,5 миллион еуро деп бағалануда. Бұл — оның соңғы бес жылдағы ең төменгі көрсеткіші.
Маусымаралық кезеңде Зайнутдинов түркиялық «Бешікташтан» Мәскеудің «Динамо» клубына ауысқан болатын. Алайда жарақатына байланысты ол 19 қазаннан бері алаңға шыққан жоқ. Ұзақ үзіліс футболшының нарықтық бағасына тікелей әсер еткені байқалады.
Ал Санкт-Петербургтің «Зенит» клубында ойнайтын қорғаушы Нұралы Әліп пен Грозныйдың «Ахмат» командасының шабуылшысы Максим Самородовтың трансферлік құны өзгеріссіз қалды. Екеуі де 2,5 миллион еуроға бағаланған.
Аталған үш қазақстандық футболшының барлығы трансферлік құны бойынша тек алматылық «Қайраттың» 17 жастағы шабуылшысы Дастан Сәтпаевтан кейін тұр. Жас ойыншының бағасы қараша айында 3 миллион еуроға дейін өскен еді.