RUS
SMARTNEWS.KZ басылымының хабарлауынша, қазақ қоғамының болашағына қауіп төндіретін жаңа құбылыс туралы Мәжіліс депутаты Ерлан Саиров мәлімдеді. Ол 17 желтоқсан күні өткен пленарлық отырыста елімізде рулық сананы насихаттаушы әрекеттерге қарсы пікір білдірді.
Депутаттың айтуынша, қазіргі таңда кейбір контент жасаушылар мен кәсіпкерлер қазақ халқының руық санасын арттырып, оны коммерциялық мақсатта пайдалануда. Олар өз өнімдерін жарнамалау үшін жейделер мен күртелерге ру атауларын жазып, оларды бренд ретінде сатуда. Әлеуметтік желілерде жастарға руға бөліну мәдениеті насихатталуда, бұл қоғамды іштен бұзады деп атап өтті.
«Бұл құбылыстың фильмдерге де жеткені алаңдатады. Қазір кинотеатрларда қазақтардың руларын салыстыру мен кемсітуге бағытталған шығармалар жарық көріп жатыр. Мұндай фильмдер қазақ ұлтының бірлігін бұзады. Жастарға қандай үлгі көрсеткіміз келеді?» – деді Ерлан Саиров.
Депутат бұл үрдістің ұлттық тұтастықты бұзуға алып келетінін және мемлекетіміздің ішкі тұрақтылығына нұқсан келтіретінін айтты. Ол министрліктер деңгейінде арнайы комиссия құруды ұсынды. Бұл комиссияның мақсаты – отандық фильмдер мен мәдени контенттің ұлттық бірлікке, идеологияға және көркемдік эстетикаға сәйкес келуін тексеру болмақ.
Сонымен қатар, Саиров қоғамды бөлетін және ру айырымын күшейтетін әрекеттерге қарсы нақты шаралар қабылдау қажеттігін атап өтті.
«Қоғамды бөлуші, тайпалық сана мен бөлініске алып келетін әрекеттердің алдын алуымыз керек. Ұлттық код пен мәдени ерекшеліктерді насихаттау деген желеумен қоғамды бөлетін барлық әрекеттерді тоқтатуға тиіспіз», – деп мәлімдеді депутат.