RUS
SMARTNEWS.KZ басылымының хабарлауынша, Қазақстан Президенті Қасым-Жомарт Тоқаевтың Жапонияға ресми сапары аясында жалпы құны 3,7 млрд АҚШ долларынан асатын коммерциялық келісімдерге қол қою жоспарланып отыр. Бұл туралы Президенттің көмекшісі – баспасөз хатшысы Руслан Желдібай мәлімдеді.
Токио қаласында Мемлекет басшысы жапондық ірі бизнес өкілдерімен жеке кездесулер өткізеді. Нәтижесінде энергетика, жаңартылатын энергия көздері, цифрландыру, тау-кен өндірісі және көлік салаларын қамтитын 40-тан астам құжатқа қол қойылады деп күтілуде.
Қазақстан тарапынан келісімдерге «Самұрық-Қазына», KEGOC, «Қазатомөнеркәсіп», «Тау-Кен Самұрық», «Қазпошта», «Қазақстан темір жолы» секілді ұлттық компаниялар қатысады. Жапония жағынан Marubeni, MUFG Bank, Mitsubishi Heavy Industries, Hitachi Energy, Toshiba, JOGMEC, Kansai Electric Power, RIKEN KOGYO және өзге де алпауыт корпорациялар бар.
Президент сапарының бағдарламасы ресми келіссөздер мен іскерлік кездесулерге толы. Бұл сапар Қазақстан мен Жапония арасындағы стратегиялық әріптестікті жаңа деңгейге көтеруге бағытталған.
Айта кетейік, Қасым-Жомарт Тоқаев Жапонияға ресми сапармен келді. Күн тәртібінде экономикалық серіктестікті кеңейту, «Орта дәлізді» дамыту, инвестициялық жобалар және технологиялық әріптестік мәселелері тұр.