RUS
SMARTNEWS.KZ басылымының хабарлауынша, Ресей президенті Владимир Путин Украинадағы соғысқа Батыс пен АҚШ-тың бұрынғы әкімшілігі тікелей себепкер болды деп мәлімдеді. Бұл туралы ол 17 желтоқсанда Мәскеуде өткен Қорғаныс министрлігінің кеңейтілген алқа отырысында айтты.
Путиннің сөзінше, Батыс елдері Ресейдің әлсіреуін күтіп, «елдің күйреуінен пайда көргісі келді». Алайда, оның айтуынша, бұл жоспар іске аспаған.
«Көпшілік Ресей қысқа уақытта ыдырайды деп ойлады. Еуропадағы кейбір күштер де осы үмітпен әрекет етті. Бірақ Ресей бұл қысымға төтеп берді», — деді ол.
Ресей басшысы Мәскеу әрдайым дауларды дипломатиялық жолмен шешуге ұмтылғанын айтып, АҚШ-пен диалогта белгілі бір ілгерілеу барын жеткізді. Ал Еуропалық одақ елдерімен қарым-қатынас Украинаға қолдау көрсетуіне байланысты жақсармағанын атап өтті.
Путиннің айтуынша, Ресей «қарулы қақтығысқа амалсыздан баруға мәжбүр болды». Ол бұл үшін Батысты және нақтырақ айтқанда АҚШ-тың бұрынғы президенті Джо Байден әкімшілігін айыптады.
Сонымен қатар Ресей президенті 2025 жыл қорытындысы бойынша «арнайы әскери операцияның» барысын оң бағалады. Оның мәлімдеуінше, ресейлік әскер майдан шебінің барлық бөлігінде стратегиялық бастаманы өз қолында ұстап отыр және Украина аумағында 300-ден астам елді мекен бақылауға алынған.
Путин Батыстың Ресей мен НАТО арасындағы ықтимал соғыс туралы мәлімдемелерін «өтірік әрі сандырақ» деп атады.
Осы арада Bloomberg агенттігі дереккөздеріне сүйеніп, АҚШ Ресей Украинамен бейбіт келісімді қабылдамайтын болса, жақын арада жаңа санкциялар енгізуі мүмкін екенін хабарлады. Әңгіме, ең алдымен, энергетика секторына, сондай-ақ «көлеңкелі флот» деп аталатын ресейлік танкерлер мен қаржылық операцияларға қатысы бар трейдерлерге қатысты шектеулер туралы болып отыр. Мәскеу бұл жоспарлардан хабардар екенін растады.