RUS
SMARTNEWS.KZ басылымының хабарлауынша, Түркістан облысының Келес ауданындағы Қошқарата ауылында Келес өзені үстінен өтетін көпір құлады. Оқиғаға дейін көпірде жарық пайда болып, қауіпсіздік мақсатында қозғалыс уақытша тоқтатылған.
Қазіргі уақытта оқиға орнында төтенше жағдайлар қызметінің, полицияның және жергілікті атқарушы органдардың өкілдері жұмыс істеуде. Жағдай толық бақылауға алынған.
Алдын ала мәліметке сәйкес, көпірдің құлауына оның ұзақ жылдар бойы пайдаланылуы және тірек бағандарының астыңғы бөлігінің шайылуы себеп болған. Аталған нысан Түркістан облысының жолаушылар көлігі және автомобиль жолдары басқармасының балансында болған.
Қазір көпірге шұғыл жөндеу жұмыстары жүргізіліп жатыр. Ал Алпамыс пен Біртілек ауылдық округтері арқылы қатынау уақытша айналма жолдармен жүзеге асырылуда. Айналма бағыттардың ұзындығы шамамен 10–15 шақырымды құрайды.