RUS
SMARTNEWS.KZ басылымының хабарлауынша, қалалық әділет органдары мен полиция департаменті жүргізген бірлескен жедел тексеріс нәтижесінде контрафактілік өнім өндіру фактісі анықталды. Бұл туралы ҚР Әділет министрлігі мәлімдеді.
Тексеру барысында тез еритін «3/1» кофе өнімін «С» есімді азаматтың жеке гаражда дайындағаны белгілі болды. Өнімге пайдаланылған шикізаттың сапасы күмән тудырады, ол алдын ала дайын қаптамалар түрінде сатып алынған. Заңсыз цехта дайын қоспаны термотігіс арқылы орау, қаптау және өзге компанияға тиесілі тауар белгісін жапсыру жұмыстары жүргізілген.
Анықталған контрафактілік өнімдер Шымкент қаласындағы шағын дүкендер мен сауда нүктелері арқылы сатылған. Тексеру нәтижесінде «MacCoffee» 3/1 тауар белгісі бар 4 мыңнан астам дайын орама, сондай-ақ өндірістік жабдықтар — термотігіс аппараты, таразы және қаптама материалдары тәркіленді.
Құқық иеленуші тараптың ресми мәліметіне сәйкес, тәркіленген өнімдер белгіленген сапа стандарттарына сәйкес келмейді және тұтынушылардың денсаулығы мен өміріне нақты қауіп төндіруі мүмкін.
Аталған дерек бойынша «С» есімді азаматқа қатысты ҚР Әкімшілік құқық бұзушылық туралы кодексінің 158-бабы — «Өзге біреудің тауар белгісін заңсыз пайдалану» бойынша әкімшілік іс қозғалды. Материалдар түпкілікті шешім қабылдау үшін сотқа жолданды.