RUS
SMARTNEWS.KZ басылымының хабарлауынша, Google компаниясы Қазақстан Республикасының Тәуелсіздік күніне орай Gemini жасанды интеллект моделін қазақ тілінде іске қосты. Бұл қадам компанияның ең озық ЖИ шешімдерінің тілдік қолдауын кеңейтуге бағытталған жаһандық стратегиясының бір бөлігі болып отыр.
Қазақ тілі Gemini-дің үшінші буынын іске қосу аясында қосылған 23 жаңа тілдің қатарына енді. Осылайша, Қазақстандағы пайдаланушылар енді Gemini мүмкіндіктерін әлемдегі ең кең таралған тілдермен тең дәрежеде, ана тілінде қолдана алады.
Қазіргі уақытта Gemini-дің қазақ тіліндегі интерфейсі веб-нұсқада қолжетімді. Қызметті пайдалану үшін Google аккаунтының тіл баптауларынан қазақ тілін таңдау жеткілікті. Алдағы кезеңде Android және iOS платформаларына арналған қолдау, сондай-ақ Gemini Live сервистерін іске қосу жоспарланып отыр.
Gemini-дің қазақ тілінде қолжетімді болуы Google-дың Қазақстандағы жасанды интеллектіні дамытуға бағытталған жүйелі жұмысының бір бөлігі саналады. Бұл бастама кадр даярлау, цифрлық құзыреттерді арттыру және отандық әзірлеушілерді қолдау бағыттарын қамтиды.
Компанияның бағалауынша, жасанды интеллектіні мемлекеттік секторға кеңінен енгізу басқару тиімділігін арттырып, бюджет жүйесінің тұрақтылығын нығайтады және ел экономикасының өсуіне қосымша серпін береді.
Ал ҚР Жасанды интеллект және цифрлық даму министрлігінің мәлімдеуінше, жаһандық ЖИ шешімдерінің қазақ тілінде қолжетімді болуы — цифрлық мемлекетті қалыптастыру, технологияларға тең қолжетімділікті қамтамасыз ету және бәсекеге қабілетті ұлттық AI-экожүйе құру жолындағы маңызды кезең.
Министрлік жасанды интеллектіні дамыту, цифрлық өнімдерді локализациялау және жаңа буын мамандарын даярлау бағытында халықаралық технологиялық серіктестермен ынтымақтастықты жалғастыратынын атап өтті.