ШҚО әкімі Өскеменде автобусқа мініп, жолаушылармен сөйлесті
Облыс әкімі автобуспен жүріп, қаланың мәселесін тыңдады.
SMARTNEWS.KZ басылымының хабарлауынша, Шығыс Қазақстан облысының әкімі Нұрымбет Сақтағанов Өскемен қаласында қоғамдық автобусқа мініп, жолаушылармен тілдесті. Аймақ басшысының сапары түсірілген бейнежазба оның ресми Instagram парақшасында жарияланды.
Әкімнің айтуынша, бұл қадам қаланың қыс мезгіліндегі жағдайын өз көзімен көру үшін жасалған. Ол көшелердің қардан тазалануы мен қоғамдық көліктің жұмысын жеке бақылап көрмек болған.
Нұрымбет Сақтағанов қала ішіндегі бағыттардың бірімен жүріп өтіп, жолаушылардың пікірін тыңдағанын атап өтті. Тұрғындар автобус қатынасының жақсарғанын айтқанымен, бұл бағыттағы бақылауды әлсіретуге болмайтынын жеткізген.
Осыған байланысты облыс әкімі Өскемен қаласының әкіміне проблемалы әрі жүктемесі жоғары бағыттарды жеке тексеруді тапсырды. Атап айтқанда, қозғалыс кестесінің сақталуы мен көліктің нақты желіге шығу жағдайына ерекше назар аудару қажет екенін айтты.
Аймақ басшысы қар тазалау мен қоғамдық көліктің тұрақты жұмысы тұрғындардың күнделікті өмір сапасына тікелей әсер ететін негізгі міндеттер екенін атап өтті.
Материал авторы
