RUS
SMARTNEWS.KZ басылымының хабарлауынша, Қазақстанның белгілі актері Мұрат Бисембиннің қызы Сафия әкесінің ауруханаға түсуіне байланысты жұртшылыққа үн қатты. Ол қиын сәтте қолдау білдіріп жатқан жанкүйерлерге алғысын жеткізген.
23 желтоқсанда Сафия әлеуметтік желідегі парақшасында әкесімен бірге түскен суретін жариялап, тек жақсыға сенетінін жазды. Ол әлемнің түкпір-түкпірінен келген ізгі тілектер мен дұғалардың отбасы үшін аса маңызды екенін атап өтті.
«Ең қымбатым. Ең сүйіктім. Ең мықты адам. Әлемнің әр түкпіріндегі жақсы жандар дұға жасап, жақсыға сеніп отыр. Баршаңызға қолдауларыңыз, сенімдеріңіз бен дұғаларыңыз үшін шексіз алғыс айтамын. Бұл біз үшін баға жетпес. Барлығы жақсы болады. Әмин», — деп жазды ол.
Желі қолданушылары актерге тезірек сауығып кетуін тілеп, қолдау білдірді. Кейбірі Мұрат Бисембин түскен фильмдерді қайта прокатқа шығарып, түскен қаражатты оның оңалтуына бағыттауды ұсынды.
Еске салсақ, 21 желтоқсанда «Рэкетир» культтік дилогиясында қылмыстық топ жетекшісі Русланның рөлін сомдаған актер инсульт алып, ауруханаға жеткізілген еді. Бұған дейін Сафия әкесінің жағдайы бірде жақсарып, бірде күрделеніп жатқанын айтқан. Ол әкесін рухани да, физикалық тұрғыдан да өте мықты адам деп сипаттаған.
2024 жылдың күзінде Мұрат Бисембинге қатерлі ісік диагнозы қойылғаны белгілі болды. Денсаулығына байланысты актер бірқатар жобадан бас тартып, кей түсірілімдерді уақытша тоқтатуға мәжбүр болған.