Зеленский Рождество қарсаңында украиндардың ең ауыр тілегін ашық айтты

SMARTNEWS.KZ басылымының хабарлауынша, Рождество қарсаңындағы дәстүрлі үндеуінде Украина президенті Владимир Зеленский украин халқының ортақ тілегін айтып, Ресейдің Украинаға қарсы шабуылдарын тағы да қатаң сынға алды. Бұл туралы халықаралық БАҚ жазды.

Мемлекет басшысы үндеуінде президент Владимир Путиннің атын атамай, украиндардың көкейіндегі басты тілекті ишарамен жеткізді. Зеленскийдің айтуынша, украиндар Рождество түнінде «аспан ашылады» деп сенеді және сол сәтте айтылған тілек орындалады деген наным бар.

«Бүгін бәріміздің арманымыз бір. Біз бір ғана тілекті тілейміз – баршаға ортақ тілек», – деді ол.

Осы тұста Зеленский Ресей президентін меңзей отырып, украиндардың ішкі күйін ашық сипаттады. Алайда ол бұл сөздердің түпкі мәні кек емес, соғыстың аяқталуына деген үміт екенін атап өтті.

«Біз Құдайдан өлім емес, бейбітшілік сұраймыз. Біз Украина үшін бейбітшілік тілейміз. Ол үшін күресіп жатырмыз. Оған лайықпыз», – деді Украина басшысы.

Зеленский әр отбасының тыныш өмір сүріп, әр баланың күлкі мен мейірімге бөленуін, сенім мен үміттің жоғалмауын қалайтынын жеткізді.

Рождество кезіндегі шабуылдар

Украина президенті сөзінде Ресейдің 2022 жылдан бері Рождество кезеңін бітімге емес, соққы жасауға пайдаланып келе жатқанын еске салды. 2022 жылдың 25 желтоқсанында Украина энергетикалық инфрақұрылымына жаппай зымыран және дрон шабуылы жасалып, бейбіт тұрғындар қаза тапты. 2023 жылы Херсонда дрон соққысынан төрт адам көз жұмды.

2024 жылы Рождество күні Ресей 70-тен астам зымыран және 100-ден аса ұшқышсыз аппарат ұшырып, кемінде бір адам қаза тауып, Харьков облысында жарты миллион тұрғын жылусыз қалған.

«Төртінші жыл қатарынан – тәуелсіздік үшін жүріп жатқан төртінші толық ауқымды соғыста – бізден осының бәрін тартып алуға тырысып жатыр. Біз бүгін жерімізді, отбасымызды, өз үйіміздегі тыныштық сезімін қорғап отырмыз», – деді Зеленский.

Бейбіт жоспар аясындағы жағдай

Зеленскийдің үндеуі АҚШ бастамашы болған бейбіт жоспардың кейбір тұстары жарияланған күні айтылды. Украина мен АҚШ бірқатар негізгі мәселелер бойынша ортақ ұстанымға келгенімен, Донбасс аумағы мен Запорожье атом электр станциясының тағдыры әлі де келісілмеген.

Украина президенті Донецк пен Луганск облыстарының болашағын «ең күрделі мәселе» деп атады. Ресей Киевтің Донбасс аумағынан толық бас тартуын талап етіп отыр, алайда Украина бұл талапты қабылдаған жоқ.

Рождество қарсаңында Ресей Украина аумағына 131 дрон ұшырды. Соның салдарынан кемінде екі адам қаза тауып, 35 адам жарақат алды.

Үндеу соңында Зеленский әділдік пен жақсылықтың жеңетініне сенетінін айтты.

«Бейбітшіліктің жеңісі болсын. Біз болайық. Украина болсын», – деді ол.