RUS
SMARTNEWS.KZ басылымының хабарлауынша, Ақмола облысының Макинск қаласындағы мектептен оқу-жаттығу қаруын ұрлаған ер адамға сот үкімі шықты. Бұл туралы Almaty.tv арнасы жеткізді.
Сот шешімімен күдіктіге үш жыл мерзімге бостандығын шектеу жазасы тағайындалып, пробациялық бақылау енгізілді. Сонымен қатар ол мәжбүрлі қоғамдық жұмыстарға тартылатын болды.
Іс материалдарына сәйкес, ер адам оқу орнында жөндеу жұмыстарын жүргізуге ресми түрде кіргізілген. Осы мүмкіндікті пайдаланған ол мектеп мүлкін заңсыз иемденіп, ғимараттың терезесі арқылы сыртқа алып шыққан.
Ұрланған заттардың қатарында Калашников автоматының оқу үлгісі мен бірнеше пневматикалық спорттық мылтық бар. Келтірілген материалдық шығын көлемі 300 мың теңгеден асты.
Қару-жарақтың жоғалғаны анықталған соң мектеп әкімшілігі полицияға жүгінген. Жедел-іздестіру шаралары барысында құқық қорғау органдары күдіктінің жеке басын анықтап, оны ұстады.
Айыпталушы өз кінәсін толық мойындап, келтірілген шығынды толығымен өтеген.
Ақмола облыстық полиция департаментінің аға инспекторы Әсем Абдрахманованың айтуынша, ұрлық фактісі тергеу барысында толық дәлелденген. Қазіргі таңда үкім заңды күшіне енді.