RUS
Ауа-райының нашарлауына байланысты (қар, көктайғақ, боран) көлік пен қоғамдық көліктің қозғалыс жылдамдығы төмендеді. Автобустар кешігіп жүріп жатыр. Қаладағы кейбір көшелерде жүру тіптен қиындады.
City Transportation Systems Елорда жолдарында коммуналдық қызметтер күшейтілген режимде жұмыс істейтінін хабарлап отыр.
CTS барлық жол қозғалысына қатысушыларды жолда мұқият болуға және бағдарды алдын ала жоспарлауға шақырды.
"Барлық жүргізушілерді жолда мүмкіндігінше мұқият болуға, қауіпсіз қашықтықты сақтауға, жылдамдық режимін таңдауға, шұғыл тежеуді болдырмауға шақырамыз. Біздің компанияның диспетчерлік қызметі қаладағы қоғамдық көліктің қозғалысын онлайн режимде бақылайтынын атап өту қажет", - делінген хабарламада.
Сонымен қатар CTS 04:45-те ауа-райының қолайсыздығына және тас жолдардың жабылуына байланысты, №№300, 305, 308, 309, 310, 312, 315, 316, 317, 318, 322, 327, 328 қала маңы бағдарларының қозғалысы уақытша тоқтатылғанын хабарлады. Басқа қала маңы бағдарлары линияға шығады.
Ал Instagram-дағы astana_sergek паблигі қаладағы жағдайдан фото, видеолар жариялап, тұрғындарға ескерту жасап жатыр.
"Одан да шаңғымен жүрген жақсы. Бүкіл Астана бір орында тұр, қозғалмайды", - деп жазылған паблик жариялаған фотолардың сипаттамасында.
Қалада электрсамокат айдап жүргендер де бар. Себебі көлікпен де, жаяу да қолғалу дәл қазір ыңғайсыз болып тұр.
Үш күн бойы Астанада 37,6 мм қар түсті. Жауын-шашын нормасы айына - 22 мм. Елордадан ұшатын және елордаға ұшып келетін рейстер кешігіп жатыр. Рейс кестесін тексерген абзал.
Еске сала кетейік, Елордада бірінші ауысымдағы оқушылар ауа райына байланысты онлайн оқиды.