Маңызды мәлімдеме: Трамп Украина бойынша келіссөздер шешуші кезеңге өткенін жеткізді

SMARTNEWS.KZ басылымының хабарлауынша, АҚШ президенті Дональд Трамп Украинадағы соғысты тоқтатуға бағытталған келіссөздер шешуші сатыға жақындағанын мәлімдеді. Бұл туралы ол Украина президенті Владимир Зеленскиймен Флорида штатындағы Мар-а-Лаго резиденциясында кездесер алдында айтты.

Трамптың сөзінше, әрі Зеленский, әрі Ресей президенті Владимир Путин бейбіт келісімге шынайы мүдделі.

«Адам шығыны тым көп болды. Менің ойымша, екі президент те келісімге келгісі келеді. Украина үшін де, барша үшін де тиімді шешімге қол жеткізуге барлық алғышарт бар. Бұдан маңызды мәселе жоқ», — деді АҚШ президенті.

Дональд Трамп Украинаға «берік қауіпсіздік кепілдіктері» берілетінін айтып, бұл үдеріске Еуропа елдерінің белсенді араласып отырғанын атап өтті.

«Еуропалық мемлекеттер бұл процесте өзін өте жоғары деңгейде көрсетті. Олар кездесуді де, келісім жасалуы мүмкін екенін де толық қолдайды», — деді Трамп.

Сонымен қатар АҚШ басшысы Украина делегациясымен кездесуден кейін Ресей президенті Владимир Путинмен тағы да телефон арқылы сөйлесетінін растады. Бұған дейін екі ел басшылары келіссөздер басталар алдында бір сағаттан астам уақыт телефонмен сөйлескен. Ресей президентінің көмекшісі Юрий Ушаковтың айтуынша, әңгіме АҚШ тарапынан басталған.

«Жаңа жылға дейін көп мәселе шешілуі мүмкін»

Мар-а-Лагодағы америкалық-украиналық кездесу бірнеше аптаға созылған жоғары деңгейдегі қарқынды дипломатиялық келіссөздерден кейін өтіп жатыр.

Бұған дейін Владимир Зеленский бұл кезеңді «жылдағы ең белсенді дипломатиялық күндер» деп атап, көп нәрсе Жаңа жылға дейін шешілуі мүмкін екенін айтқан.

«Біз қолдан келгеннің бәрін жасап жатырмыз. Алайда нақты шешімдер серіктестерге байланысты. Украинаға көмектесіп отырғандарға да, Ресейге қысым көрсетіп отырғандарға да», — деп жазды Украина президенті әлеуметтік желіде.

Сонымен бірге Зеленский Мәскеудің соғысты тоқтатуға ниеті жоқ екенін мәлімдеді. Оның айтуынша, соңғы бір аптада ғана Ресей Украина қалаларына 2100-ден астам дрон соққысын жасап, 800-ге жуық басқарылатын әуе бомбасын және 94 түрлі зымыран қолданған.

«Ресей өкілдері ұзақ сөйлейді, бірақ шын мәнінде олардың ұстанымын «Кинжалдар» мен «Шахедтер» көрсетіп отыр. Бұл — Путин мен оның айналасының нақты позициясы», — деді Зеленский.

Еуропа келіссөз үстелінде жоқ, бірақ байланыста

Флоридадағы келіссөздерге еуропалық көшбасшылар тікелей қатысып отырған жоқ. Дегенмен Украина президентінің кеңсесі Зеленский мен Трамптың кездесуден шамамен бір сағат өткен соң Еуропа елдерінің басшыларымен телефон арқылы сөйлесуі жоспарланғанын хабарлады.

АҚШ-қа жол тартпас бұрын Владимир Зеленский Канадаға аялдап, премьер-министр Марк Карнимен кездескен. Сондай-ақ ол Еуропа елдері мен НАТО басшыларымен онлайн форматта кеңес өткізіп, Флоридадағы келіссөздер алдындағы ұстанымдарды үйлестірген.