RUS
SMARTNEWS.KZ басылымының хабарлауынша, 29-30 желтоқсан аралығында Қазақстанның басым бөлігінде ауа райы күрт құбылып, қауіпті метеорологиялық құбылыстар күтіледі. «Қазгидромет» синоптиктері көптеген облыстарда тұман, көктайғақ, боран, қатты жауын-шашын мен екпінді желге байланысты дауылды ескерту жариялады.
Атырау, Маңғыстау, Ақтөбе, Қызылорда облыстарында тұман мен көктайғақ болжанған. Кей өңірлерде жол көрінісі күрт нашарлап, көлік қозғалысына қауіп төнуі мүмкін.
Түркістан облысында түнгі уақытта және таулы аудандарда қатты жауын-шашын күтіледі. Желдің екпіні 20 м/с-қа дейін жетіп, тау асуларында 23 м/с-тан асады. Шымкент пен Түркістан қалаларында да жел күшейеді.
Қарағанды, Ұлытау, Павлодар, Солтүстік Қазақстан, Қостанай және Ақмола облыстарында қар мен жаңбыр аралас жауын-шашын, бұрқасын, көктайғақ күтіледі. Кей өңірлерде желдің екпіні 28 м/с-қа дейін күшеюі ықтимал.
Батыс Қазақстан облысында боран соғып, қар нормадан көп түсуі мүмкін. Ал Абай және Шығыс Қазақстан облыстарында жел күшейіп, таңғы уақытта тұман түсуі болжанған.
Астана қаласында 30 желтоқсанда жаңбыр мен қар аралас жауын-шашын, тұман және көктайғақ күтіледі. Желдің екпіні кей уақытта 20 м/с-қа дейін жетеді.
Алматы және Жетісу облыстарында жел күшейіп, Алакөл көлдері ауданында желдің жылдамдығы 30 м/с және одан да жоғары болуы мүмкін.
Мамандар тұрғындарды жолға шыққанда сақ болуға, алыс сапарды кейінге қалдыруға және ауа райы болжамын қадағалап отыруға шақырады.