RUS
SMARTNEWS.KZ басылымының хабарлауынша, Атырау облысында келісімшарт негізінде әскери қызмет атқарған екі сержанттың қаржылық пирамида ұйымдастырып, ондаған азаматты алдағаны анықталды. Қылмыстық схема салдарынан өңір тұрғындары 55 миллион теңгеден астам қаржысынан айырылған. Бұл туралы АқЖайық басылымы жазды.
Тергеу материалдарына сәйкес, күдіктілер өздерін америкалық Harmony Rider Technology (HRT) компаниясының өкілдері ретінде таныстырып, азаматтарды «жоғары табыс әкелетін бизнеске» тартқан. Жоба көпдеңгейлі инвестициялық жүйе ретінде ұсынылып, барлығы тоғыз деңгейден тұрған.
Әр деңгейге өту үшін салымшылар USDT криптовалютасымен белгілі бір мөлшерде ақша салуы тиіс болған. Ең төменгі жарна – 350 доллар, ал ең жоғарғысы – 35 мың доллар. Ұйымдастырушылар бұл қаржы есесіне Еуропа мен АҚШ-та электросамокаттарды жалға беру бизнесін «онлайн басқаруға мүмкіндік беріледі» деп уәде еткен.
Мысалы, 350 доллар салған қатысушы алты самокатты «басқарып», күніне 12 доллар табыс табады деген жалған есеп ұсынылған. Түскен қаржы жеке кабинетке күн сайын есептеліп, кейін OKX криптобиржасы арқылы шешіп алуға болады деп көрсетілген. Алайда салымшылармен ешқандай келісімшарт жасалмаған, ал www.harmony-rider.com платформасы 2024 жылдың желтоқсанынан бері жұмыс істемейді.
Тергеу барысында HRT-ның электросамокат бизнесіне мүлде қатысы жоқ екені белгілі болды. Төлемдер нақты табыстан емес, жаңа қатысушылардың қаражаты есебінен жүргізілген. Бұл – классикалық қаржылық пирамиданың айқын белгісі.
Аталған схема алты өңірде – Алматы, Атырау, Жамбыл, Қызылорда облыстарында, сондай-ақ Астана мен Алматы қалаларында жұмыс істеген.
Қазақстан Республикасының Әскери сотының судьясы Ғалия Алипанованың айтуынша, Атыраудағы құрылымдық бөлімшені 21642 әскери бөлімінде қызмет еткен екі сержант басқарған. 2024 жылдың тамыз-желтоқсан айлары аралығында 69 тұрғын пирамиданың құрбаны болып, 55 миллион теңгеден астам қаржы салған. Ал әскери қызметкерлердің өздері 5,5 миллион теңге көлемінде бонус алған.
Ақтөбе гарнизонының әскери соты сержанттарды Қылмыстық кодекстің 217-бабының 2-бөлігі, 3-тармағыбойынша кінәлі деп танып, 5 және 6 жылға бас бостандығынан айырды.
Сот үкімі заңды күшіне енді. Жәбірленушілерге келтірілген материалдық шығын толық өтелген.