RUS
SMARTNEWS.KZ басылымының хабарлауынша, АҚШ президенті Дональд Трамп Ресей билігінің Украина Қарулы күштері (ҚКУ) Владимир Путиннің Новгород облысындағы Валдайдағы резиденциясына соққы жасамақ болды деген мәлімдемесіне сенбейтінін мәлімдеді. Бұл туралы ол 4 қаңтар күні президенттік ұшақ бортында журналистермен әңгіме барысында айтты.
Президенттік пулдағы тілшілердің бірі Трамптың осы оқиғаға байланысты бұған дейін «қатты ашуланғанын» еске салғанда, АҚШ президенті сөзді бөліп:
«Мен ол соққы жасалды дегенге сенбеймін», — деді.
Неліктен ол алғашқы ақпарат тараған сәтте қатқыл пікір білдіргені жөнінде нақтылау сұрағына Трамп сол кезде ешқандай дерек болмағанын айтты.
«Ол сәтте ешкім ештеңе білмеді. Бұл туралы алғаш рет сол кезде естідім. Путин оның үйіне шабуыл жасалғанын айтты. Біз ақпаратты тексерген соң, бұған сенбедік. Бірақ ол кезде бұл — естіген алғашқы хабар еді», — деді Трамп.
Санкциялар мәселесі күн тәртібінде
Сол брифинг барысында Трамптан Ресейдің Украинаға қарсы соғысын тоқтатуға қатысты нақты мерзім бар ма деген сұрақ қойылды. Президент нақты дедлайн жоқ екенін, алайда қақтығыстың тезірек аяқталғанын қалайтынын жеткізді.
Мәскеуге қарсы жаңа санкциялар енгізу мүмкіндігі қарастырыла ма деген сауалға Трамп сенатор-республикашыл Линдси Грэмге сөз берді. Президенттің айтуынша, бұл мәселе әкімшілік ішінде күн сайын талқыланады.
Линдси Грэм Украинадағы бейбітшілікке «Путиннің клиенттеріне қарсы баж салығын енгізу қаупі арқылы» қол жеткізуге болады деп санайтынын айтты. Оның сөзінше, Трамп қазан айында Ресейдің ірі мұнай компанияларына санкция салғанымен, Мәскеудің әлі де «85 серіктесі» бар.
АҚШ-та бірнеше айдан бері талқыланып жатқан заң жобасы Ресей мұнайын сатып алатын елдерге 500 пайызға дейін баж салығын енгізуге мүмкіндік береді. Грэм Үндістанның баж салығы енгізілгеннен кейін Ресей мұнайын сатып алуды қысқартқанын мысалға келтіріп, «бұл тетік жұмыс істейді» деді. Трамп Ресей экономикасының қазіргі жағдайы нашар екенін қоса айтты.
Мәскеудің мәлімдемесі және Вашингтонның реакциясы
Ресей Украина ҚКУ Путин резиденциясына шабуыл жасамақ болды деген мәлімдемені Украина президенті Владимир Зеленский АҚШ-та сапармен жүрген тұста таратты. Зеленский бұл ақпаратты Мәскеудің Киев пен мемлекеттік ғимараттарға соққы жасауға сылтау дайындауы деп бағалап, Ресейдің бейбіт келіссөздерге кедергі келтіріп отырғанын айтты.
Кейінірек Дональд Трамп Truth Social әлеуметтік желісінде New York Post басылымының «Путиннің “шабуыл” төңірегіндегі дабылы — бейбітшілікке кедергі болып тұрған Ресей екенін көрсетеді» деген тақырыптағы мақаласын бөлісті.
1 қаңтарда РФ Қорғаныс министрлігі Путин резиденциясына бағытталған украин дронының «басқару құрылғысы» бар екенін мәлімдеп, оны АҚШ-қа тапсырғанын хабарлады. Алайда Трамптың соңғы мәлімдемелері Мәскеудің бұл уәжі Вашингтонның ұстанымына әсер етпегенін аңғартады.