RUS
SMARTNEWS.KZ басылымының хабарлауынша, Қазақстанның тұңғыш президенті Нұрсұлтан Назарбаевтың үлкен немересі Нұрәлі Әлиев 41 жасқа толуын Біріккен Араб Әмірліктерінде, Дубай маңында жоғары деңгейдегі салтанатпен атап өтті.
Туған күн кешінен түсірілген видеоларды Нұрәлі Әлиев Instagram желісіндегі парақшасында жариялаған. Кадрларда ол «Spark of life» («Өмір ұшқыны») деп жазылған дизайнерлік торттағы шамды үрлеп өшіреді. Жазбалардан оның 13 жастағы қызы Амира да байқалады. Сондай-ақ мерекелік кешке Әлиевтің үлкен ұлы Алан Нұрәліұлы мен оның қайын жұртына жататын Адина Имашева қатысқан. Адина Имашева – бұрынғы Орталық сайлау комиссиясының төрағасы Берік Имашевтің қызы.
Салтанатты шара люкс индустриясында да назардан тыс қалған жоқ. Әлемдік шоу-бизнес пен элиталық іс-шаралармен тығыз байланысты продюсер Николас Броше мерекеден сторис жариялап, кештің ұйымдастырушысы өзі болғанын аңғартты. Шара Дубайдан шамамен жарты сағаттық жерде орналасқан бес жұлдызды Terra Solis Dubai қонақүйінде өтті. Бұл кешен шөлейт аймақтағы глэмпинг, бассейн, тірі музыка және жерорта теңізі стиліндегі мейрамхананы біріктіреді. Мұнда екі адамға арналған бір бөлменің бір күндік бағасы 100 мыңнан 270 мың теңгеге дейін жетеді.
Суреттер: instagram.com/imnurali
Туған күн кеші ашық аспан астында, пальмалар мен қымбат декорациялар арасында ұйымдастырылған. Қонақтар алдында этно-фольклорлық Turan ансамблі өнер көрсеткен. Сонымен қатар алаңға қазақтың киіз үйі тігілді. Бұл шығыстық сән-салтанат аясында ұлттық нақышты айқындаған символ ретінде қабылданды. Николас Броше Instagram парақшасында туған күн иесіне алғыс білдіріп, бұл күндерді «жарыққа, үйлесім мен мерекелік көңіл-күйге толы ерекше сәттер» деп атады.
Айта кетейік, Нұрәлі Әлиев – Нұрсұлтан Назарбаевтың үлкен қызы Дариға Назарбаеваның және марқұм Рахат Әлиевтің ұлы. Рахат Әлиев кезінде Қазақстандағы ықпалды тұлғалардың бірі болған, кейін шетелде қамауға алынып, Вена түрмесінде көз жұмған. Ресми дерек бойынша, өлім себебі – өз-өзіне қол жұмсау.