RUS
SMARTNEWS.KZ басылымының хабарлауынша, Атырау облысында бір айдан астам уақыт бұрын хабар-ошарсыз кеткен отбасыға қатысты тергеу бағыты өзгертілді. Төрт адамнан тұратын отбасының ұялы телефон сигналдары соңғы рет Шымкент қаласында тіркелген. Бұл туралы AtyrauPress басылымы жазды.
25 желтоқсанда Атырау қаласының тұрғыны полицияға жүгініп, ағасының отбасымен бірге ұзақ уақыт бойы байланысқа шықпай кеткенін хабарлаған. Жоғалғандар — Қызылқоға ауданына қарасты Жангелдин ауылының тұрғындары. Олар қараша айында үйінен белгісіз бағытта шығып, содан бері оралмаған.
Із-түзсіз кеткендердің қатарында ерлі-зайыпты және олардың 33 және 35 жастағы екі ересек баласы бар. Полицияның алдын ала болжамы бойынша, отбасы елдің оңтүстік өңірлеріне бет алған болуы мүмкін.
Іздеу жұмыстары республикалық деңгейде жүргізіліп жатыр. Тергеуге басқа өңірлердің құқық қорғау органдары да тартылған. Медициналық мекемелер, оның ішінде жекеменшік клиникалар тексерілуде.
Атырау облыстық полиция департаменті бастығының бірінші орынбасары, полиция полковнигі Құттыбай Садықовтың айтуынша, отбасы мүшелерінің ұялы телефондары Қазақстан аумағында бірнеше рет қосылып-өшірілген, соңғы тіркелген орны — Шымкент қаласы.
– Арнайы жедел-тергеу тобы құрылды, министрлік тарапынан тиісті мамандар бекітілді. Іздеу барлық бағытта жүріп жатыр, – деді ол.
Оның мәліметінше, екі немесе одан да көп адамның жоғалуына байланысты іс Қылмыстық кодекстің 99-бабы — «Адам өлтіру» бойынша қайта сараланған.
– Бұл олардың қаза тапқанын білдірмейді. Істі ауыр бапқа ауыстыру — тергеу мүмкіндіктерін кеңейту үшін қабылданған процессуалдық шешім, – деп нақтылады полиция өкілі.