RUS
SMARTNEWS.KZ басылымының хабарлауынша, Шымкент қаласында дәрігерлер 4 жастағы балаға күрделі хирургиялық ота жасап, құрсақ қуысындағы ірі қатерсіз ісікті сәтті алып тастады. Бұл туралы Otyrar басылымы жазды.
Кішкентай науқас қалалық балалар клиникалық ауруханасына іштің қатты ауыруы мен қайта-қайта құсу белгілерімен жеткізілген. Толық тексеру барысында дәрігерлер құрсақ қуысының лимфангиомасын анықтаған. Бұл — сирек кездесетін қатерсіз ісік, алайда көлемі ұлғайған жағдайда ішкі ағзалардың қызметіне елеулі қауіп төндіруі мүмкін.
Ісіктің көлемі мен орналасуына байланысты дәрігерлер оны лапаротомия әдісімен толық алып тастау туралы шешім қабылдаған. Ота сәтті өткен.
Қазір баланың жағдайы қанағаттанарлық деп бағаланып отыр. Науқас ауруханадан үйіне шығарылған.
Мамандардың айтуынша, мұндай күрделі операциялар жоғары кәсіби дайындықты және заманауи медициналық жабдықтарды талап етеді.