RUS
SMARTNEWS.KZ басылымының хабарлауынша, Қазақстанда бірқатар шай өнімдерінің құрамынан тыйым салынған тағамдық бояғыштар анықталып, олардың ел аумағында сатылуы мен әкелінуіне уақытша шектеу қойылды. Бұл туралы Денсаулық сақтау министрлігіне қарасты Санитариялық-эпидемиологиялық бақылау комитеті хабарлады.
Тиісті қаулыға Қазақстанның бас мемлекеттік санитар дәрігері Сархат Бейсенова қол қойған. Комитеттің мәліметінше, жалған шай өнімдерінің ЕАЭО елдерінде сатылып жатқаны туралы ақпарат Еуразиялық экономикалық комиссиядан түскен.
Осыдан кейін Қазақстанда бақылау сатып алуы жүргізіліп, зертханалық талдау жасалған. Нәтижесінде қара шайдың кейбір үлгілерінен қолдануға рұқсат етілмеген тағамдық бояғыштар табылды. Атап айтқанда, «күн батар сарысы» (E110), тартразин (E102) және понсо 4R (E124) анықталған.
Сонымен қатар шай қаптамаларында өндіріс пен қаптау мекенжайларының жалған көрсетілгені белгілі болды. Бұл — өндірушілерде рұқсат құжаттарының болмауы мүмкін екенін көрсетеді.
«Аталған деректер санитариялық-эпидемиологиялық саламаттылық бағытында жүргізілген тексерулер барысында анықталды», — деп мәлімдеді комитет өкілдері.
Осыған байланысты бірқатар шай өнімдерінің ел аумағында сатылымы мен импорты уақытша тоқтатылды.
Сатылымы шектелген шай түрлері:
«Апамның шәйі Premium gold», «Орда Кения», «Аль-Кайрат шәйі Premium gold» — өндіруші және қаптаушы: «Orda Trade Astana» ЖШС (Алматы облысы);
«Al-Hayat Golg» — өндіруші: «Empire KENIY E.P.Z. Limited» (Алматы облысы);
«Балқия Premium gold» — қаптаушы: «Аль-Хадия» ЖК (Алматы);
«Sultan Suleyman», «Pakistan tea» — өндіруші: «Real Trade Astana» ЖШС (Астана);
«Aje Onim» — өндіруші: «Орда Чай» ЖК (Алматы), тапсырыс беруші: «Кальций» ЖШС;
«Al-Jannat Premium» — өндіруші: «Ferdaus» ЖК (Алматы);
«Alfarah» — қаптамада өндіруші көрсетілмеген.
Комитет аталған өнімдерге қатысты тергеу жалғасып жатқанын және заң талаптарын бұзған тұлғалар жауапкершілікке тартылатынын хабарлады.