Зейнетақы қаржысын стоматология арқылы жымқырған 11 күдікті қамауға алынды
Күдіктілер элиталық мүлік сатып алған, жаңа клиникалар ашқаны анықталды.
SMARTNEWS.KZ басылымының хабарлауынша, Қаржылық мониторинг агенттігі «Бірыңғай жинақтаушы зейнетақы қоры» АҚ-дан азаматтардың жинақтарын заңсыз шығару фактілері бойынша тергеуді жалғастырып жатыр. Тергеу стоматологиялық клиникалардың басшылары мен басқа тұлғаларды қамтиды.
Алынған мәліметтерге сәйкес, зейнетақы қаражаттары формальды түрде стоматологиялық қызмет көрсету келісімдері жасасу арқылы, кейін жалған медициналық құжаттар ұсыну арқылы шығарылған. Күдіктілер алынған қаражаттың 10–20%-ын заңсыз сыйақы ретінде ұстап отырған.
Қылмыстық схемаға 42 стоматологиялық клиника қатысқан, жалпы сомасы 200 млрд теңгеден астам қаражат шығарылған. Күдіктілер бұл табысты элиталық жылжымайтын және жылжымалы мүлік сатып алуға жұмсаған, кейбірін үшінші тұлғалардың атына рәсімдеп, жаңа клиникалар ашқан.
Қазіргі уақытта 11 күдікті 2 айға қамауға алынды, ал үшеуіне үйқамақ түріндегі бұлтартпау шарасы қолданылды. Сондай-ақ, кейбір дәрігерлер дәрігерлік-консультациялық комиссиялардан (ДКК) жалған қорытындылар беріп, заңсыз сыйақы алу үшін жүйелі түрде көмектескен. Бұл соманың жалпы көлемі 30 млн теңгеден асады.
Бірқатар сотқа дейінгі тергеу амалдары басталған. Айта кетейік, өз жинақтарын алған азаматтар қылмыстық жауапкершілікке тартылмайды.
Қазақстан Республикасы Қылмыстық-процестік кодексінің 201-бабына сәйкес, басқа ақпарат жария етуге жатпайды.
Материал авторы
