RUS
SMARTNEWS.KZ басылымының хабарлауынша, Қарағандыда көпқабатты тұрғын үйде болған өрт салдарынан бір адам қаза тапты. Қайғылы оқиға 6 қаңтар күні кешкі уақытта Әбдіров даңғылындағы 12 қабатты үйдің бесінші қабатындағы пәтерде тіркелген.
Қарағанды облыстық Төтенше жағдайлар департаментінің мәліметінше, пәтер ішінде жиһаз бен тұрмыстық заттар жанған. Өрт салдарынан подъезд қатты түтінге толған.
Құтқарушылар түтін басқан подъезден сегіз адамды, оның ішінде бес баланы сыртқа алып шықты. Улы газдан уланудың алдын алу үшін эвакуацияланғандарға арнайы қорғаныш қалпақтары кигізілген. Бұдан бөлек, тағы 15 тұрғын баспалдақ арқылы қауіпсіз жерге шығарылды.
Сыртқа шығарылған адамдар уақытша «Вахтовка» арнайы техникасында жылытуға орналастырылды.
Өрт салдарынан 1997 жылы туған ер адам қаза тапты. Алдын ала дерек бойынша, ол түтінге уланып қалған. Өрттің жалпы аумағы шамамен бес шаршы метрді құрады.
Қазіргі уақытта өрттің шығу себебі анықталып жатыр.