RUS
SMARTNEWS.KZ басылымының хабарлауынша, Қостанай облысында әйелге күш қолданып, кейін оны моншаға қамап қойған екі адамға сот үкімі жарияланды. Бұл туралы облыстық соттың ресми хабарламасында айтылды.
Іс Меңдіқара аудандық сотында қаралды. Айыпталушыларға алдын ала сөз байласу арқылы адамдар тобы болып, тұрғын үйге заңсыз кіріп, тонау жасағаны үшін (ҚР ҚК 191-бабы 3-бөлігі 3-тармағы) айып тағылған.
Сотта анықталғандай, оқиға 2025 жылғы 3 желтоқсанда кешкі уақытта болған. Күдіктілер алдын ала келісіп, жәбірленушінің үйіне заңсыз кірген. Айыпталушылардың бірі әйелге өмірі мен денсаулығына қауіпті емес күш қолданып, дене жарақатын салған. Осыдан кейін оны үй ауласындағы моншаға қамап қойған.
Осы сәтте екінші айыпталушы жәбірленушінің үйінен 219 мың теңге көлеміндегі ақшаны және зергерлік бұйымдарды ашық түрде алып кеткен.
Қылмыстық әрекеттер салдарынан әйелге дене жарақаты келтіріліп, жалпы сомасы 949 мың теңгені құрайтын материалдық шығын келтірілген.
Мемлекеттік айыптаушы соттан әр айыпталушыға 5 жыл мерзімге шартты жаза тағайындауды сұраған. Жәбірленушіге келтірілген шығын толық өтелгендіктен, ол да бас бостандығынан айыруға байланысты емес жаза тағайындауды өтінген.
Айыпталушылар кінәларын толық мойындап, істеген әрекеттеріне өкініш білдірген. Сот олардың кінәні мойындауын, шынайы өкінуін, келтірілген шығынды өтеуін және жәбірленушінің пікірін жеңілдететін мән-жайлар ретінде таныды. Ауырлататын мән-жайлар анықталған жоқ.
Нәтижесінде сот әрқайсысына 5 жыл мерзімге бас бостандығынан айыру жазасын тағайындап, Қылмыстық кодекстің 63-бабына сәйкес жазаны шартты деп есептеп, пробациялық бақылау белгіледі.
Үкім заңды күшіне енген жоқ.