RUS
SMARTNEWS.KZ басылымының хабарлауынша, Абай облысында дерекқордағы техникалық әрі ұйымдастырушылық олқылықтың кесірінен жетім бала тұрғын үй алу кезегінен заңсыз шығып қалған. Бұл туралы Абай соттары хабарлады.
Сот мәліметінше, арнайы әлеуметтік қызметтерге мұқтаж балаларды қолдау орталығы кәмелетке толмаған тәрбиеленуші К.-ның мүддесін қорғап, жоғалған деректерді қалпына келтіру және оны тұрғын үй кезегіне қайта қою туралы талап-арызбен жүгінген.
Анықталғандай, К. жетім бала ретінде тұрғын үйге мұқтаждар тізімінде тұрған, алайда Абай облысындағы әкімшілік-аумақтық өзгерістер кезінде жаңадан құрылған аудан бойынша кезек тізімдері жасалған сәтте оның деректері дерекқордан жоғалып кеткен.
Сот отырысында Жаңасемей ауданының тұрғын үй-коммуналдық шаруашылық бөлімі мен Семей қаласының тұрғын үй қатынастары және тұрғын үй инспекциясы бөлімінің қызметкерлері өз міндеттеріне салғырт қарап, нәтижесінде жетім баланың заңды құқықтары бұзылғаны анықталды.
Арнайы ауданаралық әкімшілік сот лауазымды тұлғалардың әрекетін заңсыз деп танып, «Отбасы банкке» 2016 жылдан бастап К.-ның тұрғын үй кезегінде тұрғаны туралы деректерді orken.otbasybank.kz ақпараттық жүйесінде толық қалпына келтіруді міндеттеді.
Сот шешімі заңды күшіне енген. Нәтижесінде банк бір ай ішінде баланы «жетім балалар және ата-анасының қамқорлығынсыз қалған балалар» санаты бойынша тұрғын үйге мұқтаждар кезегіне қайта қосты.