Видеода әйел адам дүкен қызметкеріне: «Айтыңызшы, мынау не?» деп наразылық білдіреді. Контейнер ішін көрген қызметкер де, өзге сатып алушылар да аң-таң қалған.
Белгілі болғандай, күріштің ішінен мысықтың нәжісі табылған. Әлеуметтік желіде жарияланған видеода дүкен ішінде жүрген екі мысық та кадрға түскен. Оқиға қазақстандықтардың бірін ашуландырса, енді бірін күлкіге қарық қылды.
Компания мәліметінше, жағдай Шымкенттегі Magnum дүкендерінің бірінде болған. Оқиғадан кейін сауда желісі ішкі тексеру жүргізіп, мән-жайды анықтаған.
Magnum өкілдерінің айтуынша, түнгі уақытта тауар қабылдау кезінде көшеден екі мысық байқалмай сауда залына кіріп кеткен.
«Барлық жарма контейнерлері мөлдір қақпақпен жабық болады. Таңертең сатып алушылар күріш алып жатқанда біреу қақпақты ашық қалдырған. Сол сәтте мысық контейнерге секіріп кеткен. Бейнебақылау камералары арқылы бұл жағдайдың сағат 12:07-де болғанын анықтадық. Ал 12:09-да келесі сатып алушы салдарын байқаған», – деді компания өкілдері.
Нәтижесінде бүлінген күріш пен контейнер толықтай жойылып, дүкенде санитарлық тазалау жұмыстары жүргізілген. Сонымен қатар барлық тауарларға қосымша тексеру жасалған.
Компания зооеріктілермен байланысқа шығып, оқиғаға себеп болған мысықтарды тауып, қамқор қолына беруді жоспарлап отырғанын мәлімдеді. Алайда әзірге жануарлар табылмаған.
«Мұндай жағдай бізде алғаш рет тіркеліп отыр. Тауар қабылдау аймағы ашық болғандықтан, мысықтың кіріп кеткенін байқамау мүмкін. Қалай болғанда да, мұндай оқиғаның алдын алу жолдарын міндетті түрде қарастырамыз», – деп қосты Magnum өкілдері.
RUS
