RUS
SMARTNEWS.KZ басылымының хабарлауынша, Түркия президенті Режеп Тайып Ердоған елдегі демографиялық ахуалға алаңдаушылық білдіріп, әр отбасында кемінде үш бала болуы қажет екенін мәлімдеді. Бұл туралы ол Ыстамбұлда өткен көрме ашылуында айтты деп жазды РИА Новости.
Мемлекет басшысының айтуынша, халық санының өсуі – елдің болашағы үшін стратегиялық маңызы бар мәселе. Ол үш балалы отбасы үлгісін «берік әрі қуатты қоғамның негізі» деп атады.
«Құдайға шүкір, менің тоғыз немерем бар. Мен әрдайым айтып келемін: отбасында кемінде үш бала болуы керек. Бұл – мықты отбасының басты шарты. Біз халық санын арттыруға тиіспіз. Бұл тек біздің қалауымыз емес, бұл – Жаратқанның аманаты», – деді Ердоған.
Түркияның Статистика бюросының (TÜİK) мәліметінше, 2024 жылы елдегі жалпы туу коэффициенті бір әйелге шаққанда небәрі 1,48 баланы құраған. Бұл – тарихтағы ең төмен көрсеткіш. Ал демографтардың пайымынша, халықтың табиғи өсімін сақтау үшін бұл көрсеткіш кемінде 2,1 болуы тиіс.
Президент Түркияда 2025 жылдың «Отбасы жылы» болып жарияланғанын еске салды. Алайда оның айтуынша, қабылданып жатқан шараларға қарамастан, қоғамда бала тууға қарсы көзқарас әлі де бар.
«Тіпті жақын адамдарымыздың өзінен бала санының артуына қарсы пікір естиміз. Бұл жағдай бізді қатты алаңдатады», – деді мемлекет басшысы.
Ресми деректерге сәйкес, Түркияда туу деңгейі соңғы 60 жылдан астам уақыт бойы біртіндеп төмендеп келеді. Егер 2001 жылы әйелдер алғашқы баласын орта есеппен 27 жасында дүниеге әкелсе, 2024 жылы бұл көрсеткіш 29 жастан асқан.
Демографиялық дағдарысқа байланысты Түркия билігі бірқатар ынталандыру шарасын іске қосты. Атап айтқанда, жас отбасыларға пайызсыз несие беру, баспана жалдау кезінде жеңілдіктер ұсыну көзделген.
Түркияның отбасы және әлеуметтік қызметтер министрі Махинур Өздемир Гөкташ бұған дейін елдегі жағдайды «қауіпті деңгей» деп атап, болашақта әскерге шақырылатын жастар санының азаю қаупі бар екенін мәлімдеген. Қазіргі таңда ел халқының 10 пайызынан астамы 65 жастан асқан.