RUS
SMARTNEWS.KZ басылымының хабарлауынша, Рудный қаласында өткен футзалдан 15 жасқа дейінгі жасөспірімдер арасындағы Қазақстан чемпионатында ойын соңы жаппай жанжалға ұласты. Финалдық ысқырықтан кейін алаңда екі команда ойыншылары арасында төбелес шықты.
Оқиға Орал қаласының «Бәйтерек» командасы мен Жаңаөзеннің «БЖСМ-2» ұжымы арасындағы матчта тіркелді. Кездесу оралдықтардың жеңісімен аяқталғанымен, ойын аяқталысымен спорттық бәсеке ереже шеңберінен шығып кетті.
Матч аяқталған сәттен кейін жеңіліске ұшыраған команда ойыншылары қарсыластарына шабуыл жасап, эмоцияға ерік берген. Бірнеше секундтың ішінде жанжалға өзге ойыншылар да араласып, алаңда жаппай төбелес басталды. Оқиға куәгерлердің бейнежазбасына түсіп, әлеуметтік желілердегі спорттық парақшаларда жылдам тарады.
Батыс Қазақстан облыстық спорт басқармасы жағдайды растады.
«Футзалдан Қазақстан чемпионаты аясында өткен матчта біздің «Бәйтерек» командасы жеңіске жетті. Алайда ойын аяқталғаннан кейін қарсы тарап эмоцияға беріліп, төбелес бастады. Бұл әрекетке ешқандай себеп болған жоқ», – деп мәлімдеді ведомствоның баспасөз қызметі.
Қазіргі таңда оқиға бойынша тексеру жүргізіліп жатыр. Қорытындысына қарай қатысушыларға қатысты тәртіптік шаралар қабылданатыны хабарланды.