RUS
SMARTNEWS.KZ басылымының хабарлауынша, Украина президенті Владимир Зеленский Иранда жалғасып жатқан жаппай наразылықтарға қатысты мәлімдеме жасап, оны «көтеріліс» деп атады.
Басылымның жазуынша, Зеленский Ирандағы ахуалға байланысты пікірін Х әлеуметтік желісіндегі парақшасында жариялаған. Ол мәлімдемесін парсы тілінде жазған.
«Қазір Иранда болып жатқан жайт — ауқымды наразылықтар, шын мәнінде көтеріліс. Бұл Ресей үшін жағдай жақсармайтынының айқын белгісі. Бұл планетадағы әрбір адал адам Иран халқы Украинаға және басқа елдерге орасан зиян келтірген қазіргі режимнен ақыры азат болғанын қалайды», — деп келтіреді басылым Зеленскийдің сөзін.
Сонымен қатар Украина президенті әлемдік көшбасшыларды «өзгеріс мүмкін болып тұрған сәтті өткізіп алмауға» шақырды.
«Әрбір көшбасшы, әрбір ел, халықаралық ұйымдар дәл қазір іске кірісіп, Иранды бүгінгі күйге түсірген кінәлілерден арылуға халыққа көмектесуі тиіс. Барлығы мүлде басқаша болуы мүмкін», — деді Владимир Зеленский.
Еске салайық, Иранда 2025 жылғы 28 желтоқсанда өмір сүру құнының күрт өсуіне байланысты жаппай наразылықтар басталған. Бұл — соңғы жылдардағы ең ауқымды акциялар.
Аталған жағдай аясында АҚШ президенті Дональд Трамп Иран билігін наразылық білдірушілерге қолдау көрсетуге дайын екенін ескерткен. Ал Иранның БҰҰ-дағы тұрақты өкілі тәртіпсіздіктерді АҚШ арандатты деп айыптап, Вашингтон мен Израильдің үйлестірілген әрекеттері туралы мәлімдеді.
Бұған дейін Иранда наразылықтар кезінде адамдардың қаза табуына байланысты аза тұту жарияланған. Ресми емес деректерге сәйкес, акциялар барысында жүздеген адам көз жұмған.