RUS
SMARTNEWS.KZ басылымының хабарлауынша, Теміртауда магистральдық жылу желісінде апат тіркеліп, қаланың бір бөлігінде жылу беру тоқтатылды. Ақау 8-шағынаудан мен Отрадное шағынауданын жылумен қамтамасыз ететін негізгі құбырда болған. Бұл туралы Telegram-дағы «Вечерняя Караганда» арнасы жазды.
Апат салдарынан 8-шағынаудандағы шамамен 40 көпқабатты тұрғын үй мен Отрадное ауданындағы ондаған жеке үй жылусыз қалды. Сонымен қатар бірқатар кәсіпкерлік нысандар мен әлеуметтік мекемелерге де жылу беру уақытша тоқтатылған.
Оқиға синоптиктердің ауа температурасы –30 градусқа дейін төмендейді деген дауылды ескертуімен тұспа-тұс келіп отыр.
Қала әкімдігінің мәліметінше, зақым 1970-жылдардан бері күрделі жөндеу көрмеген ескі құбыр учаскесінде анықталған.
«Ақау орны нақтыланды. Мамандар қалпына келтіру жұмыстарына кірісті. Апаттық-қалпына келтіру бригадалары үздіксіз режимде жұмыс істеп жатыр, барлық қажетті күш пен техника жұмылдырылды. Мақсат – ақауды барынша қысқа мерзімде жою», – делінген әкімдік хабарламасында.