RUS
SMARTNEWS.KZ басылымының хабарлауынша, Алматы облысында жолаушылар тасымалдап келе жатқан маршруттық автобустың жүргізушісіне шабуыл жасалды. Оқиға сәті түсірілген бейнежазба әлеуметтік желілерде тарап, қоғам назарын аударды.
Оқиға 15 қаңтар күні таңғы уақытта №239 бағыттағы жолаушылар автобусында болған. Белгісіз ер адам қоғамдық көліктің әйнегін сындырып, жүргізушіге шабуыл жасаған. Бұл әрекет салондағы жолаушылардың қауіпсіздігіне тікелей қатер төндіріп, адамдар арасында үрей туғызған.
Әлеуметтік желіде тараған бейнежазбада шабуыл сәті анық көрінеді. «КрисПи Алматы» Telegram-арнасының мәліметінше, оқиға таңғы сағат 6 шамасында болған. Әйнегі сынғанына қарамастан, автобус шамамен жарты шақырымдай жол жүрген.
Алматы облыстық полиция департаменті аталған дерек бойынша бұзақылық бабымен сотқа дейінгі тергеу басталғанын хабарлады.
«Тергеу барысында қоғамдық көліктің әйнегін қасақана сындырған ер адам анықталды. Жедел-іздестіру іс-шаралары нәтижесінде үш күдікті ұсталды. Қазіргі уақытта негізгі фигурант уақытша ұстау изоляторына қамалды», – деп мәлімдеді полицияның баспасөз қызметі.
Құқық қорғау органдары оқиғаның барлық мән-жайын жан-жақты әрі объективті анықтауға бағытталған тергеу амалдары жалғасып жатқанын атап өтті.