RUS
SMARTNEWS.KZ басылымының хабарлауынша, Шешенстан басшысы Рамзан Қадыров ұлы Адам Қадыровтың қатысуымен түсірілген видеоны жариялады. Бұл жазба әлеуметтік желіде Адам Қадыров ауыр жол-көлік оқиғасына түсті деген ақпараттар тараған тұста шықты.
Қадыров Telegram-арнасында жариялаған мәліметке сәйкес, Адам Қадыров республиканың күштік құрылымдарының командирлерімен кеңес өткізген. Жиында алдағы сайлауға дайындық, қоғамдық қауіпсіздікті қамтамасыз ету, экстремизмнің алдын алу мәселелері талқыланған.
Сонымен қатар Рамзан Қадыров ұлына кезекті марапат тапсырылғанын хабарлады. Адам Қадыров «Атом электр стансаларының қауіпсіздігін арттырудағы еңбегі үшін» алтын медалімен марапатталған.
«Бұл награда “Росэнергоатом” концернінің бұйрығымен берілді. Ол Запорожье атом электр стансасының қауіпсіздігін қамтамасыз ету мен күзетті ұйымдастыруға қосқан үлесі үшін тапсырылды», – деп жазды Қадыров.
Еске салайық, бұған дейін бірқатар бұқаралық ақпарат құралдары Шешенстан басшысының ұлы отырған кортеж ірі жол-көлік оқиғасына түскенін, Адам Қадыровтың ауруханаға жеткізілгенін хабарлаған еді. Алайда бұл ақпарат ресми түрде расталмаған.