RUS
SMARTNEWS.KZ басылымының хабарлауынша, Республикалық алғашқы медициналық-санитарлық көмек (АМСК) орталығының басшысы Айгүл Қасымова 56 жасқа қараған шағында өмірден өтті. Қаралы хабарды Денсаулық сақтау министрі Ақмарал Әлназарова растады.
Айгүл Қасымова медицина саласында ұзақ жылдар еңбек етіп, қатардағы кардиолог-дәрігерден республикалық деңгейдегі стратегиялық орталықтың басшысына дейін көтерілген білікті маман болды. Ол Қарағанды мемлекеттік медицина институтын тәмамдаған.
Денсаулық сақтау министрі Ақмарал Әлназарова марқұмның алғашқы медициналық көмекті дамытудағы ерекше рөліне тоқталды. Оның айтуынша, дәл Айгүл Қасымованың басшылығымен республикалық АМСК орталығы базасында бірқатар пилоттық жобалар әзірленіп, кейін олар ұлттық деңгейде енгізілген жүйелі реформалардың негізіне айналды.
Министрдің атап өтуінше, Айгүл Қасымова кәсіби адалдығымен, реформаторлық көзқарасымен және басқарушылық қабілетімен ерекшеленген. Ол дәрігер миссиясын терең түсінген, командасын соңынан ерте білетін, адамдармен жұмыс істеуде ерекше жанашырлық танытқан тұлға болған.
— Ол шынайы энтузиазмымен, мамандығына деген адалдығымен және дәрігер мен басқарушының жауапкершілігін терең сезіне білуімен дараланды. Айгүл Қасымованың жарқын бейнесі әріптестерінің, шәкірттерінің және онымен бірге қызмет еткен барша азаматтың жадында мәңгі сақталады. Марқұмның туған-туыстарына, жақындарына және бүкіл медициналық қауымдастыққа қайғыра көңіл айтамын, — деді Ақмарал Әлназарова.