RUS
SMARTNEWS.KZ басылымының хабарлауынша, Астанада өткен «Қайрат» – «Брюгге» футбол матчында қоғамдық тәртіпті өрескел бұзған шетелдік жанкүйерлер полиция тарапынан ұсталды. Олар стадионда киімдерін шешіп, «Борат» фильмінде кеңінен танылған жасыл купальникпен көпшілікке көрінген.
Оқиға сәті әлеуметтік желіде тараған видеодан белгілі болды. Кадрлар Instagram желісіндегі almatinec_live парақшасында жарияланған. Жазба авторының айтуынша, бұл әрекетке «Брюгге» клубының жанкүйерлері барған.
Видеода бірнеше ер адамның үстіндегі киімдерін шешіп, атышулы купальникпен қалғаны анық көрінеді. Олардың әрекеті стадиондағы көрермендердің назарын аударып, қоғамдық тәртіпке нұқсан келтірген.
Астана қалалық полиция департаментінің баспасөз қызметі мәліметінше, 20 қаңтар күні матч кезінде үш шетел азаматы айналасындағыларға құрметсіздік танытып, қоғамдық тәртіпті бұзған.
Полицейлер аталған үш шетелдік жанкүйерді ұстап, полиция бөліміне жеткізген. Оларға қоғамдық орында мас күйде болу және ұсақ бұзақылық фактілері бойынша әкімшілік іс қозғалды. Материалдар сотқа жолданды.
Құқық бұзушылар уақытша ұстау изоляторына қамалды.
Полиция департаменті жаппай іс-шаралар кезінде қоғамдық тәртіптің күшейтілген режимде бақыланатынын еске салып, белгіленген ережелерді бұзған тұлғалар заңнамаға сәйкес жауапкершілікке тартылатынын мәлімдеді.