RUS
SMARTNEWS.KZ басылымының хабарлауынша, Петропавл қалалық соты «Қызылжар» футбол клубының бұрынғы бас бухгалтері, 62 жастағы Ольга Замелацкаяны бюджет қаражатын иемдену және салықтан жалтару бойынша кінәлі деп танып, 7 жыл 6 айға бас бостандығынан айырды. Сондай-ақ сот оны жалпы сомасы 367 млн теңге көлемінде қаржы өндіруге міндеттеді.
Үкімге сәйкес, 70 млн теңге — футбол клубына, 287 млн теңге — мемлекеттік кірістер органдарына, 10,6 млн теңге — мемлекет кірісіне өтелуі тиіс. Айыпталушы сот залында қамауға алынды.
Тергеу дерегінше, 2023 жылы «Қызылжар» клубын қаржыландыруға бюджеттен 1,7 млрд теңге бөлінген. Айыптау тарапы бұл қаражаттың кемінде 128 млн теңгесі әртүрлі схемалар арқылы клубтан тыс жұмсалғанын алға тартты. Бұған қоса, 2021–2023 жылдары 287 млн теңгеден астам салық төленбегені анықталған.
Алайда сот барысында клуб ойыншылары мен қызметкерлері қаржының мақсатсыз жұмсалмағанын мәлімдеді. Куәгерлердің айтуынша, команда толық қамтамасыз етілген: сапалы тамақтану ұйымдастырылған, спорттық нормалар сақталған, азық-түлікке дейін министрлік талаптарына сай алынған. Клубтың жеке аспазы да шығындардың нақты жүргізілгенін растаған.
Куәгерлердің сөзінше, қаражат әуе билеттеріне, трансферлерге, медициналық қызметке, сыйақыларға, матчтарды ұйымдастыру мен қонақтарды қабылдауға жұмсалған. Дегенмен, есеп жүргізу барысында заңбұзушылықтарға жол берілген: кейбір төлемдер қолма-қол жасалған, арнайы бухгалтерлік бағдарлама қолданылмаған.
Ольга Замелацкая өз сөзінде қаржы үнемі жетіспегенін, әсіресе салық төлеуде қиындық болғанын айтты. Ол тек 10 млн теңгеге қатысты эпизодты ішінара мойындап, қаражатты команданың әкімшісіне бергенін, бірақ қасақана ұрлау ниеті болмағанын жеткізді.
Сот айыпты ауырлататын мән-жай ретінде қылмыстың алдын ала сөз байласу арқылы топ болып жасалғанын ескерді.
Нәтижесінде, сот үкімімен экс-бухгалтер 7 жыл 6 айға сотталып, 367 млн теңге өндіру туралы шешім шығарылды.