Трамптың «пингвині»: Ақ үй жариялаған суретті әлем күлкіге айналдырды
Әлеуметтік желі қолданушылары Ақ үйдің жарияланымындағы өрескел қателікті сынап тастады.
SMARTNEWS.KZ басылымының хабарлауынша, АҚШ президенті Дональд Трамптың қатысуымен жасалған жасанды интеллект көмегімен әзірленген сурет әлеуметтік желілерде қызу сынға ұшырады. Ақ үй жариялаған иллюстрацияда Трамп мұзды таулар аясында пингвинмен бірге бейнеленген. Артқы фонда Гренландияның туы желбіреп тұр.
Осылайша Трамп интернетте кең тараған «нигилист пингвин» мем-трендіне қосылғандай әсер қалдырды. Бұл мем 2007 жылы Вернер Херцог түсірген «Әлемнің шетінде кездесулер» деректі фильміндегі кадрдан бастау алады. Онда Адели пингвині өз колониясынан бөлініп, Антарктиданың ішкі бөлігіне қарай жалғыз кетіп бара жатады. Жылдар өте бұл көрініс абсурд пен экзистенциялық жалғыздықтың символына айналды.
Ақ үй жариялаған суретте пингвин АҚШ туын ұстап тұр, ал тау жоталарының үстінде Гренландия туы бейнеленген. Пост «Пингвинді құшақтаңыз» деген жазумен сүйемелденген.
Алайда бұл жарияланым қолдауға емес, керісінше, жаппай сынға ұшырады. Әлеуметтік желі қолданушылары ең алдымен өрескел географиялық қателікке назар аударды: пингвиндер Арктикада өмір сүрмейді және Гренландиямен еш байланысы жоқ.
The Guardian басылымының журналисі Пиппа Крерар бұл жайтты ашық айтып, «Арктикада пингвиндер болмайды» деп жазды. Басқа қолданушылар да әжуадан тартынбады. Бірі суреттегі іздер адамның табан ізіне көбірек ұқсайтынын айтып, «Мұны жариялау — ұят» деп пікір қалдырса, енді бірі «Жақсы талпыныс, бірақ Гренландияда пингвин қайдан жүр?» деп жазды.
Кейбір қолданушылар тіпті балама нұсқаларды жасап шықты: бір суреттерде пингвин ақ аюға ауыстырылса, енді бірінде құс Трампқа «Бұл — Антарктида» деп түсіндіріп тұрғандай етіп бейнеленген.
Бұл — Трамптың Гренландия тақырыбында жасанды интеллект арқылы жасалған визуалды материалдарды алғаш рет қолдануы емес. Бұған дейін ол Гренландия АҚШ аумағы ретінде көрсетілген суреттерді, сондай-ақ Канада мен Венесуэланы қамтыған кеңейтілген карталарды жариялаған.
Айта кетейік, Дональд Трамп Гренландияны сатып алу мүмкіндігі туралы президенттік қызметке кіріскеннен кейін ашық айта бастаған. Соңғы уақытта ол бұл риториканы күшейтіп, АҚШ аралға, әсіресе әскери тұрғыда, «толық қол жеткізетінін» және оны іс жүзінде «тегін» алуға болатынын мәлімдеген.
Еске салсақ, биыл Антарктидаға қарай жалғыз бет алған пингвин бейнеленген кадр күтпеген жерден жаһандық интернет-феноменге айналған еді.
Материал авторы
