RUS
SMARTNEWS.KZ басылымының хабарлауынша, бокстан Олимпиада чемпионы Данияр Елеусінов Қарағанды облысының дене шынықтыру және спорт басқармасының басшысы, Олимпиада чемпионы Серік Сәпиевтің атына қатысты дауға байланысты өз ұстанымын айтты.
Спортшы әлеуметтік желідегі парақшасында тараған пікірлерге тоқталып, Instagram желісінде Stories жариялап, кейбір жазбаларға наразылығын білдірді. Оның айтуынша, желіде шындыққа жанаспайтын, негізсіз әңгімелер көп.
«Соңғы жаңалықтарға байланысты кейбір пікірлерді оқыдым. Өкінішке қарай, өте орынсыз сөздер де айтылып жатыр. «Күрес — күш» деп жазады. Бірақ бетпе-бет кездесуде мені бірде-бір балуан жеңген емес. Себебі менің өз атам қазақша күрестен жауырыны жерге тимеген адам болған. Өзім де күресте ешқашан әлсіз болған емеспін, үнемі жеңіп жүрдім», — деді Данияр Елеусінов.
Ол бұл сөздерін өзінің спорттағы тәжірибесімен негіздеп, мұны жеке ортасындағы адамдар растай алатынын атап өтті. Сонымен қатар Елеусінов Серік Сәпиевтің салмақ дәрежесіне қатысты да пікір білдіріп, нақты жағдайдың мән-жайын толық білмейтінін айтты.
«Серік аға - өз саласында ауыр салмақтағы тұлға. Қазір салмағы шамамен 69-70 келі. Олардың арасында нақты не болғанын білмеймін. Бұл мәселені өздері шешеді», - деді Олимпиада чемпионы.
Айта кетейік, бұған дейін Серік Сапиев пен оның орынбасары - самбо және жауынгерлік самбодан Азия және әлем чемпионаттарының жүлдегері, джиу-джитсудан әлем чемпионы Дәурен Есімханов арасында жанжал шыққаны хабарланған.
Әлеуметтік желіде тараған бейнежазбада Есімхановтың басшысын кабинеттен итеріп шығарған сәті көрінеді. Кейін полиция бұл дерек бойынша денсаулыққа зиян келтіру фактісімен қылмыстық іс қозғалғанын мәлімдеді.