Марк Цукерберг ақылды көзілдірік үшін миллиардтаған долларлық сот дауына тап болды

SMARTNEWS.KZ басылымының хабарлауынша, АҚШ-та ақылды көзілдірік нарығында шиеленіс күшейіп келеді. Solos Technology компаниясы Марк Цукербергтің Meta Platforms-ті, сондай-ақ EssilorLuxottica концернінің америкалық бөлімшесін және оның еншілес Oakley брендін өзіне тиесілі зияткерлік меншік нысандарын заңсыз пайдаланған деп айыптады. Компания осы апта соңында Массачусетс штатының федералды сотына талап арыз түсірді.

Solos Technology мәлімдеуінше, Meta мен EssilorLuxottica «ақылды көзілдірік саласындағы негізгі технологияларды» қамтитын бірнеше патентті әдейі бұзған. Талап арызда компания бірнеше миллиард доллар көлемінде өтемақы төлеуді және дауға іліккен құрылғыларды сатуға соттық тыйым салуды сұрап отыр. Бұл шектеу Ray-Ban Meta өнімдер желісінің сатылымына тікелей әсер етуі мүмкін. Аталған айыптауларға қатысты Meta мен EssilorLuxottica әзірге ресми пікір білдірген жоқ.

Салада патенттік даулардың жиілеуі ақылды көзілдіріктің танымалдығы артып келе жатқанын аңғартады. Осы айдың басында қытайлық Xreal бренді АҚШ-та бәсекелесі Viture компаниясына қарсы патент құқықтарын бұзды деген уәжбен сотқа жүгінген. Бұған дейін Meta компаниясының өзі Ray-Ban Display көзілдіріктерімен өзара әрекеттесуге арналған Neural Band білезіктеріндегі технологияға қатысты талап арызға тап болған.

Solos Technology алғашқы аппараттық әзірлемелерін шамамен он жыл бұрын ұсынған. Бастапқыда компания велосипедшілерге арналған ақылды көзілдірік шығаруға басымдық берген. Кейінгі AirGo модельдері жасанды интеллектке негізделген функциялармен толықты: әңгімелесушінің сөзін аудару, сондай-ақ ChatGPT-пен интеграция. Компания өз сайтында бұл сегмент бойынша 100-ден астам патент пен өтінімге ие екенін көрсетеді.

Соттағы негізгі талап Ray-Ban Meta Wayfarer көзілдірігінің бірінші буынына қатысты. Дегенмен талап арызда кейінгі модельдер де «алғашқы буын платформасының туындысы» екені және онда Solos-тың патенттелген технологиялары қолданылып келе жатқаны айтылған. Осылайша, құқық бұзушылық әлі де жалғасып отыр деген уәж келтіріледі.

Solos компаниясының мәліметінше, Oakley қызметкерлері бұл технологиямен 2015 жылы-ақ таныс болған. Ал Oakley-дің бұрынғы басшыларының бірі 2019 жылы құрылғының коммерциялық нұсқасын тестілеу үшін алған. Сонымен қатар EssilorLuxottica өкілдері 2017 жылы Solos қызметкерлерімен бірнеше рет кездесіп, компанияның концепциялары мен даму жоспарлары туралы ақпарат алғаны да талап арызда көрсетілген.

Meta-ға қатысты айыптаулар Массачусетс технологиялық институты жанындағы менеджмент мектебінің қызметкері Приянка Шекардың атымен байланыстырылады. Ол 2021 жылы Solos көзілдіріктеріне арналған аудиоқұрылғылар стратегиясы жөнінде зерттеу жариялап, кейін Meta компаниясына өнім менеджері ретінде жұмысқа тұрған. Solos бұл зерттеу барысында жиналған білім мен мәліметтердің Meta тарапынан пайдаланылғанын алға тартады.

Талап арызда: «Meta мен EssilorLuxottica ақылды көзілдірік нарығына шыққан сәтте, екі компания да Solos технологиялары туралы жоғары деңгейде жинақталған көпжылдық тәжірибеге ие болды» деп көрсетілген.

Айта кету керек, Solos компаниясының тұтынушылық нарықтағы өнімдері Meta жетістігімен салыстырғанда әлдеқайда әлсіз нәтиже көрсетті. Amazon платформасында компания өнімдері жиі сынға ұшыраса, Reddit желісінде қызмет көрсету сапасына қатысты шағымдар көп. Ал Ray-Ban Meta көзілдіріктері керісінше, оң пікірлерге ие болып, өндірушілер тіпті өндіріс көлемін ұлғайту мүмкіндігін де қарастырып отыр.