RUS
SMARTNEWS.KZ басылымының хабарлауынша, Apple компаниясы Siri дауыстық көмекшісінің пайдаланушылардың жеке әңгімелерін заңсыз тыңдады деген айыпқа қатысты көпшілік талап-арызды реттеу аясында өтемақы төлеуді бастады. Алғашқы төлемдер осы аптада iPhone иелеріне түсе бастады.
Бұл дау 2019 жылдан бері жалғасып келеді. Сол кезде Siri кей жағдайда пайдаланушының рұқсатынсыз іске қосылып, жеке әңгімелерді жазып алғаны, кейін бұл мәліметтер жарнама берушілерге берілгені белгілі болған. Apple кейіннен Siri-дің құпиялылық саясатын күшейткенін мәлімдеді, алайда сот дауын тоқтату үшін өтемақы төлеуге келісті.
Өтемақы алу үшін 2014 жылғы 17 қыркүйек пен 2024 жылғы 31 желтоқсан аралығында Siri орнатылған Apple құрылғысын сатып алып, «Siri-дің өздігінен іске қосылуына» тап болған пайдаланушылар өтініш бере алды. Әр адам небәрі бес құрылғыға дейін тіркей алған.
Бастапқыда Apple бұл іске 95 млн доллар бөліп, әр құрылғы үшін 20 доллардан, яғни бір пайдаланушыға ең көбі 100 доллар төлеуді жоспарлаған. Алайда өтініш берушілер санының көп болуына байланысты нақты төлем көлемі бір құрылғыға 8,02 долларды, ал бір пайдаланушыға ең көбі 40,10 долларды құрады.
Төлемдер тікелей ақша аударымы арқылы жүзеге асырылып жатыр. Ал өтемақыны сыйлық картасы түрінде алуды таңдаған қолданушыларға электронды пошта арқылы хабарлама жіберіледі.
Әдетте Siri арнайы «Сәлем, Siri» пәрмені арқылы іске қосылады. Алайда бұл жағдайда көмекші өздігінен белсеніп, кездейсоқ айтылған бренд атаулары кейіннен бағытталған жарнамада пайда болған. Төлем мөлшеріне қарағанда, өтініш беріп үлгерген Apple құрылғыларының иелері ондаған миллион адамды құрауы мүмкін.