RUS
SMARTNEWS.KZ басылымының хабарлауынша, Қостанай облысында теміржол бойында қауіпті жағдай тіркеліп, жолаушылар пойызы шұғыл тоқтауға мәжбүр болды. Оқиғаға кәмелетке толмаған балалардың теміржолға рұқсатсыз шығуы себеп болған.
Сот мәліметінше, бірнеше бала теміржолдың арнайы белгіленбеген тұсынан рельске шыққан. Жолаушылар пойызының машинисі балаларды қағып кетпеу үшін шұғыл тежеу жүйесін қолданған.
Аталған жағдайдан кейін тексеру жүргізіліп, балалардың бірінің анасы ата-аналық міндеттерін тиісінше орындамағаны анықталды. Сот оны ҚР Әкімшілік құқық бұзушылық туралы кодексінің 127-бабы 1-бөлігі бойынша кінәлі деп танып, әкімшілік жаза тағайындады.
Сот қаулысында анасының баласына қауіпсіз жүріс-тұрыс ережелерін үйретпегені, қоғамдық және тұрмыстық ортадағы қауіптер туралы түсінік қалыптастырмағаны, сондай-ақ баланың тәрбиесіне жеткілікті бақылау жасамағаны көрсетілген.
«Ол ұлын тәрбиелеуден жалтарған, қауіпсіз мінез-құлық қағидаларын түсіндірмеген және моральдық әрі адамгершілік құндылықтарды қалыптастырмаған», – деп жазылған сот шешімінде.
Сот сондай-ақ балалардың теміржолдағы әрекеті ауыр салдарға, тіпті пойыз апатына әкелуі мүмкін болғанын атап өтті.
Айта кетейік, бұған дейін Ақмола облысында теміржолда қайғылы оқиға тіркелген еді. Белгіленбеген жерден жолды кесіп өтпек болған әйел ауыр жарақат алып, ауруханада көз жұмған.