RUS
SMARTNEWS.KZ басылымының хабарлауынша, Еуропалық одақ Илон Маскке тиесілі X платформасындағы Grok жасанды интеллект чат-ботына қатысты ауқымды тергеу бастады. Бұған Grok жүйесінің сексуалдық сипаттағы, соның ішінде кәмелетке толмағандарға қатысты бейнелерді генерациялау мүмкіндігі қоғамда үлкен наразылық тудырғаны себеп болды.
Даулы жағдай өткен жылдың соңында шықты. Қолданушылардың сұранысы бойынша чат-бот әйелдер мен балалардың цифрлық жолмен «шешіндіретін» бейнелерін жаппай жасап берген. Бұл дерек әлемдік деңгейде қатты сынға ұшырады.
Алғашында X компаниясы Grok мүмкіндіктерін тек ақылы қолданушылармен шектеуді хабарлаған. Алайда кейінірек платформа нақты адамдардың ашық немесе анайы бейнелерін жасау функциясын барлық пайдаланушылар үшін толық бұғаттады.
Еуропалық комиссияның мәлімдеуінше, тергеу барысында X компаниясының Grok функцияларын ЕО аумағында іске қосу кезінде тәуекелдерді қаншалықты дұрыс бағалап, алдын ала шектеу шараларын қолданған-қолданбағаны тексеріледі.
Комиссияның технология, қауіпсіздік және демократия мәселелеріне жауапты жоғары лауазымды өкілі Хенна Вирккунен бұл іске қатысты былай деді:
«Әйелдер мен балаларға қатысты сексуалдық дипфейктер — зорлық-зомбылықтың, адам қадір-қасиетін таптаудың жол берілмейтін түрі. Бұл тергеу X платформасының заң алдындағы міндеттерін орындаған-орындамағанын немесе еуропалық азаматтардың, соның ішінде әйелдер мен балалардың құқықтарын сервистің «қосалқы шығыны» ретінде қарастырған-қарастырмағанын анықтауға бағытталған».
CNN тілшілері пікір сұрағанда, X компаниясы 14 қаңтарда жарияланған ресми мәлімдемесіне сілтеме жасаған. Онда компания балаларды сексуалдық қанау материалдарын және келісімсіз жалаңаштықты қоса алғанда, заңбұзушылық контентті жою бойынша шаралар қабылдайтынын, сондай-ақ мұндай материалдарды таратқан аккаунттар туралы құқық қорғау органдарына хабарлайтынын мәлімдеген.
Алайда Еуропалық комиссия өкілдері компанияның кейін қабылдаған шектеулерін мойындағанымен, чат-ботты іске қоспас бұрын тәуекелдер тиісті деңгейде бағаланбағанын атап өтті.
Тергеу ЕО-ның Цифрлық қызметтер туралы заңы (Digital Services Act) аясында жүргізіліп жатыр. Бұл заң ірі технологиялық компанияларға заңсыз және зиянды контентпен күресуді күшейтуді міндеттейді.
Тергеудің нақты мерзімі жарияланған жоқ. Дегенмен комиссия өкілдері айыппұл салу мүмкіндігі барын жоққа шығармайды.
«Біздің басты мақсат — платформаның мінез-құлқын өзгерту», — деді аты-жөні жарияланбаған еуропалық шенеунік.