RUS
SMARTNEWS.KZ басылымының хабарлауынша, Apple келесі буын смартфондарының таныстырылым кестесін түбегейлі өзгертуі мүмкін. Танымал инсайдер Digital Chat Station мәліметінше, iPhone 18-дің базалық нұсқасы тек 2027 жылдың алғашқы тоқсанында сатылымға шығады.
Ал 2026 жылдың қыркүйегінде компания дәстүрлі толық линейканың орнына тек iPhone 18 Pro модельдерін және Apple тарихындағы алғашқы бүктелмелі смартфон — iPhone Fold құрылғысын таныстыруды жоспарлап отыр.
Инсайдердің дерегіне сүйенсек, бұл екі модель де премиум сегментке бағытталады. Бағасы шамамен 10 мың юань (шамамен 1450 АҚШ доллары) деңгейінде болуы мүмкін.
Дереккөз қыркүйек айында қытайлық өндірушілер де жаңа флагмандық смартфондарын нарыққа шығаратынын атап өтті. Бұл жағдай Pro және Pro Max санатындағы бәсекені күшейтеді. Негізгі интрига — қытай брендтері жоғары баға сегментінде орнығып, 5000–7000 юань (720–1000 доллар) аралығындағы нарық үлесін тартып ала ала ма деген сұрақ.
Айта кетейік, Digital Chat Station бұған дейін Xiaomi 15 пен Xiaomi 15 Pro модельдерінің сипаттамаларын дәл болжаған. Сондай-ақ ол Realme GT 7 Pro смартфоны Samsung өндірісінің жарқын экранын алатынын және Dimensity 9400 процессоры Snapdragon 8 Elite-тен бұрын таныстырылатынын алғаш хабарлаған инсайдер ретінде танымал.