RUS
SMARTNEWS.KZ басылымының хабарлауынша, Петропавл қаласында жедел әрекет ету қызметтері дабыл бойынша көтерілді. Қала тұрғындарын автобус аялдамасында жатқан иесіз пакет алаңдатқан.
Облыстық полиция департаментінің мәліметінше, 16 қаңтар күні таңертең Батыр Баян көшесіндегі аялдамада күмән тудырған пакет байқалып, бұл туралы «102» арнасына хабар түскен. Қауіпсіздік мақсатында полицейлер көшені уақытша жауып, саперлердің жұмысын қамтамасыз еткен.
Тексеру нәтижесінде қауіпті заттар табылған жоқ. Белгілі болғандай, пакет ішінде кәдімгі тұрмыстық қоқыс қана болған.
Кейін учаскелік полиция инспекторы, Петропавл қалалық полиция басқармасының екінші бөлімінің қызметкері Мұрат Арыков жүргізген тексеріс барысында құқықбұзушы анықталды. Ол 65 жастағы зейнеткер болып шыққан. Бұрын өзі де қала көшелерін тазалау жұмыстарында еңбек еткен азамат бұл жолы қоқысты арнайы жәшікке апармай, аялдамаға қалдырып кеткен.
Айта кетейік, екі жыл бұрын осы ер адамның жұбайы да қоқысты белгіленбеген жерге тастағаны үшін жауапқа тартылған. Содан бері әйел мұндай заңбұзушылыққа жол бермеген.
Ортақ пайдаланылатын аумақты ластағаны үшін әкімшілік материал сотқа жолданып, құқықбұзушы айыппұл төлеуге міндеттелді.